कपिलवस्तुको दुई स्थानीय तहका १५ सय विद्यार्थीलाई पुनः विद्यालय फर्काइयो
कपिलवस्तु, माघ १७ गते । कपिलवस्तुको मायादेवी गाउँपालिका र सुद्धोधन गाउँपालिकामा युरोपियन युनियनको आर्थिक सहयोगमा सञ्चालन गरिएको समता र पहुँचका लागि साझेदारी परियोजना(पिक) ले विद्यालय बाहिर रहेका १५ सय विद्यार्थीलाई पुनः विद्यालय फर्काएको छ ।
दुई स्थानीय तहमा विद्यालय बाहिर रहेका १५ सय ४६ बालबालिको संख्यालाई तीन वर्षमा घटाएर जम्मा १३ मा झार्न परियोजना सफल भएको ग्लोबल एक्सन नेपालका प्रमुख बिके श्रेष्ठले बताए ।
परियोजनाले दुइ स्थानीय तहका २४ सामुदायिक विद्यालयमा अध्ययन गर्ने बालबालिकाको शिक्षण सिकाईलाई प्रभावकारी बनाउन शैक्षिक सामाग्री तथा शिक्षकलाई तालिम प्रदान गरेको उनले बताए ।
विद्यालय बाहिर रहेका बालबालिकाको अभिभावकलाई विभिन्न आयमुलक काममा लगाएर बालबालिकालाई फेरि विद्यालय फर्कने वातावरण बनाउन आफूहरु सफल भएको उनको भनाई छ ।
कम आय भएका समुदायका १ हजार बालबालिकालाई शैक्षिक सामाग्री बितरण गरेको श्रेष्ठले बताए । त्यसैगरी १ सय २० परिवारलाई आयआर्जनको कार्यक्रममा जोडेको र शैक्षिक सामाग्री नभएका २४ सामुदायिक विद्यालयलाई परियोजनाले शैक्षिक सामाग्री प्रदान गरेको थियो ।
गरिब विद्यार्थीको पहिचान गरि ३४ सय वटा टिफिन बक्स वितरण गरेको तथा २ वटा विद्यालयमा चमेना गृह र २ वटामा माछापालनका लागि सहयोग गरिएको थियो ।
युरोपियन युनियनको आर्थिक सहयोगमा एसएसडिसी, ग्लोवल एक्सन नेपाल र वी वल्र्डले सञ्चालन गरेको पिक परियोजनाबारे तीन बर्षिय कार्य प्रगति शुक्रबार सार्वजानिक गरिएको हो ।
कार्यक्रममा शिक्षाविद् डा. मनप्रसाद वाग्लेले परियोजनाले स्थानीय सरकारसँग समन्वय गरेर विद्यालय बाहिर रहेका विद्यार्थीलाई फेरि विद्यालय ल्याउन सक्नु महत्वपुर्ण रहेको बताए ।