सञ्चारमन्त्री बाँस्कोटाद्वारा राजिनामा; अर्थमन्त्री र भौतिक पूर्वाधार तथा यातायात मन्त्रीलाई थप जिम्मेवारी
काठमाडौं, ८ गते । सञ्चारमन्त्री तथा सूचना प्रविधी मन्त्री गोकुलप्रसाद बाँस्कोटाले राजिनामा दिनुभएको छ ।
मन्त्री बाँस्कोटाले आज प्रधानमन्त्री केपी शर्मा ओली समक्ष नैतिकताको आधारमा मन्त्री पदबाट राजिनामा दिएको उहाँको आधिकारिक फेसबुक पेज तथा ट्वीटर हाण्डल मार्फत् सो जानकारी दिनुभएको छ ।
‘मेरो बारेमा प्रश्न उठेकोले सम्माननीय प्रधानमन्त्रीज्यू समक्ष नैतिकताको आधारमा मन्त्री पदबाट राजिनामा दिएको जानकारी गराउँदछु। धन्यवाद ।’ बाँस्कोटाको आधिकारिक फेसबुक तथा ट्वीटर हाण्डलमा उल्लेख छ ।
अर्थमन्त्री र भौतिक पूर्वाधार तथा यातायात मन्त्रीलाई थप जिम्मेवारी
अर्थमन्त्री डा. युवराज खतिवडालाई सञ्चार तथा सूचना प्रविधि मन्त्रालय र भौतिक पूर्वाधार तथा यातायात मन्त्री वसन्तकुमार नेम्वाङलाई सहरी विकास मन्त्रालयको थप जिम्मेवारी दिइएको छ ।
राष्ट्रपति विद्यादेवी भण्डारीले सञ्चार तथा सूचना प्रविधि मन्त्रालयको जिम्मेवारी अर्थमन्त्री डा. युवराज खतिवडालाई र सहरी विकास मन्त्रालयको जिम्मेवारी भौतिक पूर्वाधार तथा यातायात मन्त्री वसन्तकुमार नेम्वाङलाई तोक्नुभएको छ ।
राष्ट्रपति कार्यालयबाट जारी गरिएको विज्ञप्तिमा सञ्चार तथा सूचना प्रविधि र सहरी विकास मन्त्री गोकुलप्रसाद बाँस्कोटाले आफ्नो पदबाट राजीनामा दिनुभएपछि प्रधानमन्त्रीको सिफारिसमा उहाँहरुलाई थप जिम्मेवारी दिइएको हो ।