कोरोना सम्बन्धी सरकारी कोषमा पूर्वराजाद्वारा दुई करोड सहयोग (वक्तव्य सहित)
काठमाडौँ, चैत १८ गते । पूर्वराजा ज्ञानेन्द्र शाहले बुहारी हिमानी संरक्षक रहेको हिमानी कोष मार्फत दुई करोड रुपैयाँ नेपाल सरकारको कोरोना भाइरस संक्रमण रोकथाम नियन्त्रण र उपचार कोषलाई दिएका छन् । मंगलबार वक्तव्य जारी गर्दै पूर्वराजा शाहले दुःख कष्ट र आपत विपतको यो घडीमा सबैको साथमा आफूले पनि साथ दिएको उल्लेख समेत गरेका छन् ।
देशलाई लकडाउन गर्ने सरकारी निर्णयको उनले स्वागत गर्दै सबैले पालना गर्नुपर्नेमा जोड दिएका छन् । पूर्वराजा शाहले भनेका छन् ‘यो अवस्थामा यो अवस्थाबाट मुक्त हुन लगाउने बाध्यतमक अनिवार्यता भएको हामी सबैले बुझेका छौं र यसको पालनामा गैरजिम्मेवार हुने छुट कसैलाई पनि छैन भन्ने पनि बुझ्नु जरुरी छ ।’
‘विश्वमा अहिले देखा परेको कोरोना भाइरसको महामारीले सिङ्गो मानव सभ्यता र विकासलाई नै गम्भीर चुनौती दिएको हामीले ठानेका छौँ, देश र जनतामा यस महामारीले भय र सन्त्रास पैदा गराएको छ’ विज्ञप्तीमा उनले भनेका छन्, ‘मानव अस्तित्व रक्षाका निम्ति भइरहेको पहलप्रति संवेदनशील हुँदै हामी सबैले आआफ्नो ठाउँ र क्षमताबाट केही न केही योगदान पुर्याउनुपर्ने अनिवार्य भइसकेको छ ।’
पूर्वराजा शाहले महामारीको संकटमा ज्यानको पर्वाह नगरी सेवामा खटिएका सबैप्रीत आभारपनि व्यक्त गरेका छन् । उनले भनेका छन्, ‘महामारीको यो संकटमा आफ्नो ज्यानको प्रवाह नगरी अहोरात्र सेवामा खट्नु हुने चिकित्सक नर्स र अन्य स्वास्थ्यकर्मी तथा नेपाली सेना, नेपाल प्रहरी र सशस्त्र प्रहरी लगायत सम्पूर्ण सुरक्षाकर्मीका साथै जनतालाई समयमै सूसुचित गरेर योगदान पुर्याउने सञ्चारकर्मी एवं पत्रकारप्रति हामी आभारी छौँ ।’
यस्तो छ पूर्वराजाको वक्तव्य
पूर्व श्री ५ महाराजाधिराज ज्ञानेन्द्र वीर विक्रम शाहदेवबाट विश्वमा देखा परेको “कोभिद १९” को सम्बन्धमा बक्सेको सन्देश
विश्वमा अहिले देखा परेको कोरोना भाइरसको महामारीले सिङ्गो मानव सभ्यता र विकाशलाई नै गम्भीर चुनौती दिएको हामीले ठानेका छौं। देश र जनतामा यस महामारीले भय र संत्रास पैदा गराएको छ। मानव अस्तित्व रक्षाका निम्ति भइरहेको पहल प्रति सम्बेदनशील हुँदै हामी सबैले आ-आफ्नो ठाँउ र क्षमताबाट केही न केही योगदान पुर्याउनु अनिवार्य भै सकेको छ।
यो अबस्थाबाट मुक्त हुन “लकडाउन” नै बाध्यात्मक अनिवार्यता भएको हामी सबैले बुझेका छौँ र यसको पालनामा गैह्र जिम्मेवार हुने छुट कसैलाई पनि छैन भन्ने बुझ्नु पनि जरूरी छ।
महामारीको यो संकटमा आफ्नो ज्यानको प्रवाह नगरी अहोरात्र सेवामा खट्नुहुने चिकित्सक, नर्स र अन्य स्वास्थ्यकर्मी तथा नेपाली सेना ,नेपाल प्रहरी र शशस्त्र प्रहरीलगायत सम्पूर्ण सुरक्षाकर्मीका साथै जनतालाई समयमै सुसूचित गरेर योगदान पुर्याउने सन्चारकर्मी एवं पत्रकारहरूप्रती हामी आभारी छौँ। आम नेपाली दाजुभाई तथा दिदी बहिनीले दुस्खको घडीमा अभाव र समस्या सहेर पनि यस बिरुद्ध लड्न जुन अनुशासन तथा धैर्यता दर्शाउनुभएको छ यसको हामी उच्च सराहना गर्दछौं।
राहत, उद्धार र ब्यवस्थित बन्दोबस्त जुटाउन सरकारी र गैह्र सरकारी सबै पक्षबाट समन्वयकारी ढंगमा मानवीय सेवा सहयोगमा काम भै रहेको बेलामा यसको प्रसंशा गर्दै यसलाई अझै प्रभावकारी बनाउन हामी अनुरोध गर्दछौ। दुस्ख(कष्ट र आपत(बिपदको यो घडीमा सबैका साथमा साथ दिदै हाम्रो तर्फबाट हिमानी कोषलाई रू २ करोड दिई नेपाल सरकारको “कोरोना भाईरस संक्रमण, रोकथाम, नियन्त्रण र उपचार कोष” मा दाखिला गर्न बुझाएका छौ। यस कार्यले पनि केही सहयोगी भूमिका रहने विश्वास लिएका छौ।
भगवान श्री पशुपतिनाथले हामी सबैको रक्षा गरून्,
जय नेपाल।