कपिलबस्तुमा दुई जनामा कोरोना पुष्टि, कुल १०१ पुग्यो; थप आठजना कोरोना संक्रमित निको भए
काठमाडौं, वैशाख २५ गते । कपिलबस्तुका दुई जनामा कोरोना संक्रमण पुष्टि भएको छ । यो सँगै केरोना संक्रमण पुष्टि हुनेको संख्या १०१ पुगेको स्वास्थ्य तथा जनसंख्या मन्त्रालयले प्रेस विज्ञाप्ति मार्फत जानकारी गराएको छ ।
कोसी अस्पतालमा उपचाररत थप आठजना कोरोना संक्रमित निको भए
विराटनगरस्थित कोसी अस्पतालको कोरोना उपचार केन्द्रमा उपचार गराइरहेका थप आठजना कोरोना संक्रमित निको भएका छन् ।
प्रदेश १ सरकारको कोरोना सूचना डेस्कका अनुसार उनीहरू सबैलाई शुक्रबार बिहान डिस्चार्ज गरिनेछ । यसअघि विराटनगर– १० स्थित कोसी अस्पतालको कोरोना उपचार केन्द्रमै उपचाररत ६ जना भारतीय जमाती बुधबार निको भएर डिस्चार्ज भएका थिए ।
सबैको दोस्रोपटक पिसिआर टेस्ट गर्दा रिपोर्ट नेगेटिभ आएपछि डिस्चार्ज गर्न लागिएको हो । यससँगै प्रदेश १ मा उपचार गराइरहेका ३१ जना कोरोना संक्रमितमध्ये निको हुनेको संख्या १४ पुगेको छ ।
प्रदेश १ मा पिसिआर विधिबाट हालसम्म एक हजार सात सय ८९ जनाको परीक्षण गरिएको छ । त्यस्तै आरडिटी विधिबाट ६ हजार आठ सय ३१ जनाको परीक्षण गरिएको मुख्यमन्त्री तथा मन्त्रिपरिषद् कार्यालयमातहत रहेको कोरोना सूचना डेस्कले जनाएको छ ।