काठमाडौँ, धनुषा र धादिङमा तीन नयाँ सङ्क्रमित थपिए, कुल २४९; पिसिआर परीक्षणको दायरा बढाउन सर्वोच्च अदालतकाे आदेश
काठमाडौँ, जेठ १ गते । कोभिड–१९ का तीन नयाँ सङ्क्रमित थपिएका छन् । स्वास्थ्य तथा जनसङ्ख्या मन्त्रालयले थपिएका नयाँ तीन सङ्क्रमित धनुषा, धादिङ र काठमाडौँ दहचोकका रहेका छन् ।
स्वास्थ्य तथा जनसङ्ख्या मन्त्रालयका सहप्रवक्ता डा. समिरकुमार अधिकारीले काठमाडौँ दहचोक निवासी ७ वर्षीय बालक, धनुषाको जनकपुरधामका १७ वर्षीया महिला र धादिङ निबासी ३० वर्षीया महिला रहेको जानकारी दिनुभएको छ । तीनैजनाको राष्ट्रिय जनस्वास्थ्य प्रयोगशाला, टेकुमा परीक्षणमा कोभिड–१९ को सङ्क्रमणको पुष्टि भएको हो । तीनैजनाको स्वास्थ्य अवस्था सामान्य रहेको र स्वास्थ्यकर्मीको सम्पर्कमा रहेको मन्त्रालयले उल्लेख गरेको छ ।
तीनजना नयाँ सङ्क्रमित थपिएसँगै कोभिड–१९ का बिरामीको सङ्ख्या २४९ पुगेको छ ।
पिसिआर परीक्षणको दायरा बढाउन सर्वोच्च अदालतकाे आदेश
सर्वोच्च अदालतले पिसिआर परीक्षणको दायरा बढाउन सरकारलाई आदेश दिएको छ । कोभिड– १९ महामारी नियन्त्रण गरी आमनागरिकको जीवन रक्षा गर्न तत्कालै परीक्षणको दायरा बढाउनुपर्ने अदालतको आदेश छ ।
अधिवक्ता कमलबहादुर खत्रीसहितले दायर गरेको रिट निवेदनमाथि बिहीबार सुनुवाइ भएको थियो । न्यायाधीश डा. मनोजकुमार शर्माको एकल इजलासले पिसिआर परीक्षणको दायरा बढाउन र त्यसको अभाव हुन नदिन निर्देशन दिएको हो । अदालतले सरकारका नाममा कारण देखाऊ आदेश जारी गरेको छ ।
निवेदकले अन्तरिम आदेशको माग गरे पनि अदालतले विपक्षीलाई १५ दिनभित्र लिखित जवाफसहित उपस्थित हुन भनेको छ ।