थप एक हजार १२० सङ्क्रमितसहित ४१ हजार ६४९; काठमाडौँ उपत्यकामा ३८८ सङ्क्रमित थपिए
काठमाडौँ, भदौ १७ गते । नेपालमा एक हजार १२० जना कोरोना सङ्क्रमित थपिएका छन् । थप ३२० महिलासहित ११२० जना कोरोना भाइरस पुष्टि भएको छ । स्वास्थ्य तथा जनसङ्ख्या मन्त्रालयले दैनिक प्रेस ब्रिफिङमा पछिल्लो २४ घण्टामा थपिएकासँगै सङ्क्रमित हुने कुल ४१ हजार ६४९ पुगेको जनाइएको छ ।
सकृय सङ्क्रमितहरू १८ हजार १०८ रहेका छन् । संस्थागत आइसाेलेसनमा दश हजार ४९३ रहेका छन् ।
पछिल्लो २४ घण्टामा एक हजार ११२ जना कोरोना सङ्क्रमित निको भएर घर फर्केका छन् । योसँगै कुल निको हुने दर ५६ प्रतिशत छ । कुल डिस्चार्ज भएकाहरू २३ हजार २९० पुगेको छ ।
विदेशबाट फर्केका अधिकांश क्वारेन्टिनमा बसेका छन् । यसरी बस्नेहरू छ हजार ७६६ रहेका छन् ।
काठमाडौँ उपत्यकामा कोरोनाका ३८८ सङ्क्रमित थपिए
काठमाडौँ उपत्यकामा कोरोनाभाइरसका ३८८ सङ्क्रमित थपिएका छन् । पछिल्लो चौबीस घण्टामा आरटीपीसीआर परीक्षणबाट काठमाडौँ उपत्यकाको तीन जिल्लामा ३८८ सङ्क्रमित थपिएकाे पुष्टि भएकाे हाे ।
स्वास्थ्य तथा जनसङ्ख्या मन्त्रलायले दैनिक प्रेस ब्रिफिङको क्रममा काठमाडौँमा ३५०, ललितपुरमा २९ र भक्तपुरमा नौ जना सङ्क्रमित पुष्टि भएको जनाएको छ ।