शङ्ख पार्कमा खुला शारीरिक व्यायामशाला
शिवा तामाङ / काठमाडौँ, वैशाख १३ गते । काठमाडौँ महानगरपालिकाको वडा ४ स्थित शङ्खपार्कमा खुला शारीरिक व्यायामशाला सञ्चालन भएको छ । महानगरका प्रमुख विद्यासुन्दर शाक्यले सोमवार उक्त शारीरिक व्यायाम गर्ने स्थानको उद्घाटन गर्दै यहाँ व्यायाम गर्न आउने उपभोक्ताबाट आएको प्रतिक्रियाका आधारमा थप ठाउँमा विस्तार गर्ने योजना रहेको बताउनुभयो ।
प्रमुख शाक्यले अतिक्रमित सार्वजनिक जग्गालाई पहिचान गर्ने, अतिक्रमण हटाउने र सार्वजनिक उपयोगमा ल्याउने काममा धेरै प्रगति भएको बताउनुभयो ।
उपप्रमुख हरिप्रभा खड्गी श्रेष्ठले, पार्क संस्कार जोगाउन सके सामाजिक व्यवस्थापनमा ठूलो सहयोग पुग्ने बताउँदै व्यवस्थित पार्कले स्थानीयको शारीरिक र मानसिक स्वास्थ्य मजबुत हुने बताउनुभयो ।
पार्कमा जडान गरिएका सामानको उपयोग गर्दै वडाध्यक्ष मोहनबहादुर विष्टले, वडाका अन्य पार्कमा पनि सामान जडान गर्ने विचार व्यक्त गर्नुभयो ।
व्यायाम स्थानमा राखिएका उपकरणहरु एव्डोमिनल फिटनेट कम्बाइनेसन, एअर वाकर, डबल सर्फोर्ड, सिङ्गल रोइङ् मेसिन, डबल स्लिट्स मेसिन, लेग एक्स्टेक्सन एण्ड फिटनेस राइडर, स्डान्डिङ् एण्ड सिटिङ् ट्वीस्टर, पुस अप एण्ड डिपस्टेशन र लेग लिप्टरलगायत हरेक उमेर समूहका व्यक्तिले प्रयोग गर्न सक्ने आठ लाख रुपियाँ बराबरका छन् ।