किसानलाई ६५ प्रतिशतसम्म राहत दिइने; भारत, अमेरिका र बेलायमा राजदूत सिफारिस
काठमाडौं, कात्तिक ११ गते । सरकारले बाढीपहिरो र डुबानका कारण धानबालीमा क्षति ब्यहोरेका किसानलाई राहत दिने भएको छ ।
बिहीबार बसेको मन्त्रिपरिषद् बैठकले १० कठ्ठाभन्दा कम जग्गा भएका किसानलाई क्षतिको ६५ प्रतिशतसम्म राहत दिने निर्णय भएको सरकारका प्रवक्ता ज्ञानेन्द्रबहादुर कार्कीले जानकारी दिनुभयो ।
प्रवक्ता कार्कीका अनुसार ३ विघासम्म जग्गा भएका किसानलाई क्षतिको ३० प्रतिशत र ३ विघाभन्दा बढी जग्गा भएका किसानलाई २० प्रतिशत राहत दिने निर्णय भएको छ ।
भारत, अमेरिका र बेलायमा राजदूतकाे नाम सिफारिस
काठमाडौं, कात्तिक ११ गते । सरकारले भारत, अमेरिका र बेलायमा राजदूत सिफारिस गरेको छ । बिहीबार बसेको मन्त्रिपरिषद्को बैठकले तीन देशमा राजदूत सिफारिस गरेकाे सरकारका प्रवक्ता तथा सञ्चार तथा सूचना प्रविधिमन्त्री ज्ञानेन्द्रबहादुर कार्कीले बताउनुभयाे ।
गृहमन्त्री खाणका अनुसार भारतमा डा. शंकर शर्मा, अमेरिकामा श्रीधर खत्री र बेलायतमा ज्ञानचन्द्र आचार्यलाई राजदूत सिफारिस भएको जानकारी दिनुभयो । यसैगरी बैठकले प्राकृति विपत् बाढीपहिरोमा परि मृत्यु भएका र बेपत्ता नागरिकका परिवारलाई दुई लाख दिने निर्णय भएको उहाँले जानकारी दिनुभयो ।
प्रधानसेनापति शर्मा भारत भ्रमणमा जानुहुने
नेपाली सेनाका प्रधानसेनापति प्रभुराम शर्मा कात्तिक २३ गते भारत भ्रमणमा जाने हुनुभएको छ । बिहीबार बसेको मन्त्रिपरिषद् बैठकले सेनापति शर्मालाई भारत भ्रमणमा जान स्वीकृत दिएको सरकारका प्रवक्ता तथा सञ्चार तथा सूचना प्रविधिमन्त्री ज्ञानेन्द्रबहादुर कार्कीले जानकारी दिनुभयो ।
भारतले प्रदान गर्ने मानार्थ महारथीको सम्मान ग्रहण गर्न प्रधानसेनापति शर्मा यही कात्तिक २३ गते भारत जाने कार्यक्रम रहेको छ । उहाँ कात्तिक २६ गते स्वदेश फर्किनु हुनेछ ।
साथै बैठकले उपरथी सरोजप्रताप राणालाई रथीमा बढुवा गर्ने निर्णय समेत भएको उहाँले जानकारी दिनुभयो ।