सेनाको सफा हिमाल अभियान जारी
काठमाडौं, वैशाख २६ गते । नेपाली सेनाको अगुवाईमा “सफा हिमाल अभियान-२०२३” अन्तर्गत परिचालित टोलीले सगरमाथा, ल्होत्से, बरुन्चे तथा अन्नपूर्ण हिमाल सफाई कार्य जारी राखेको छ ।
तीन वटा समूहमा परिचालित टोलीले मिति २०८० वैशाख २४ गतेसम्म विभिन्न हिमालबाट २९ हजार ४०२ केजी फोहोर संकलन गरेको छ । अभियानमा संलग्न जनशक्तिलाई हौसला प्रदान गर्नुका साथै हालसम्म भैरहेको कार्य प्रगतिबारे जानकारी लिन बलाध्यक्ष रथी सिताराम खड्काले वैशाख २३ गते अन्नपूर्ण आधार शिविरको भ्रमण गर्नुभएको थियो ।
भ्रमणमा पोखरा महानगरपालिकाका प्रमुख धनराज आचार्य पनि सहभागी हुनुहुन्थ्यो । अन्नपूर्ण हिमाल सफाई कार्यक्रमलाई पोखरा महानगरपालिकाले पनि सहयोग गरेको छ ।
विश्व वातावरण दिवस जुन ५ तारिखमा सम्पन्न हुने यस अभियानले विश्वव्यापी चुनौतीको रुपमा रहेको वातावरण प्रदुषण तथा विश्व तापमानको असरलाई न्यून गर्न सचेतना फैलाउने एवं हिमालहरुमा थुप्रिएको फोहोर हटाउन केहि सहयोग पुग्ने विश्वास नेपाली सेनाले लिएको छ ।