प्रदिप गिरिको अभाव आउने पुस्तालाई खड्किने छ : प्रधानमन्त्री प्रचण्ड
जीवछ यादव / लहान, भदौ २२ गते । प्रधानमन्त्री पुष्पकमल दाहाल ‘प्रचण्ड’ले समाजावादी चिन्तक प्रदिप गिरिको आवश्यक्ता आउने पुस्तालाई पनि खड्किरहने बताउनुभएको छ । प्रदिप गिरि मेमोरियल ट्रष्टले आयोजना गरेको प्रदिप गिरिको प्रथम वार्षिकी कार्यक्रमलाई लहान–१४ मा उहाँको पूर्ण कदको शालिकलाई अनावरणपछि आयोजित कार्यक्रमलाई सम्बोधन गर्दै यस्तो बताउनुभएको हो ।
सदा जीवन उच्च विचारका चरित्र अंगालेको गिरिले माओवादीले उठाएको मागलाई आतङककारी नभनी राजनीतिक एजेन्डा भएको भनिरहने एक आदर्श नेताको रुपमा उहाँलाई लिएको प्रधानमन्त्री प्रचण्डले बताउनुभयो ।
‘‘आउने पुस्तालाई समेत गिरिको उच्च समाजवादी विचार र दर्शन ज्ञानको रुपमा समर्थक रहने छ । गरिब, दलित उत्पीडित जनताको पक्षमा सधै सदनमा बोल्ने र कलम चलाउने गिरीको सम्झनामा लहानमा मेडिकल अस्पताल र लहान नेपालटार राजमार्ग निर्माणको कार्यलाई अघि बढाउने छौं’’, प्रधानमन्त्री प्रचण्डले भन्नुभयो ।
प्रदिप गिरीसँग केही वर्ष अगाडि एक धार्मिक सांस्कृतिक कार्यक्रममा लहान आएको प्रसंगसमेत प्रधानमन्त्री प्रचण्डले सुनाउनुभयो ।
सिरहा जिल्लाले दोस्रो संविधान सभाको निर्वाचनमा चुनाव जिताएर प्रधामन्त्रीसमेत बनाएको भन्दै प्रचण्डले जिल्लाले लगाएको गुण तिर्न यसपटक जिल्लाको लागि शिक्षा स्वास्थ्य कृषि र पूर्वाधारको क्षेत्रमा काम गरेर प्रदिप गिरिको सपना सकार गरिने विश्वास दिलाउनुभयो ।
वार्षिकी सभामा अर्थमन्त्री डा. प्रकाशशरण महतले प्रदिप गिरिले स्थापना गरेको लहान–१४ वस्तीपुरको आश्रममा उहाँ जिउँदै हुँदा आएको स्मरण गर्नुभयो ।
अश्रमलाई विचारको मन्थन र आध्यात्मिक चिन्तनको लागि अध्ययन केन्द्रको रुपमा विकास गरिने प्रतिबद्धता व्यक्त गर्नुभयो । अर्थमन्त्री महतले भन्नुभयो, ‘‘उहाँको जीवनकालमा आफू धेरै सिकेको छु । उहाँको सपनालाई सकार गर्नको लागि पछाडि परेको समुदायहरुलाई मूलधारमा ल्याउन शिक्षा स्वास्थ्य र कृषिको क्षेत्रमा सरकार काम गरिरहेको छ ।’’
परराष्ट्रमन्त्री नारायणप्रसाद साउदले आफू नेपाल विद्यार्थी संघको राजनीतिदेखि नै नेता गिरिको अनुयायी रहेको बताउनुभयो । गिरी पार्टीको विचारभन्दा मुलुकको विचारलाई प्राथमिकतामा राख्ने नेता रहेको स्मरण गर्नुभयो ।
जवाहरलाल नेहरु विश्वविद्यालय भारतमा पढ्दा प्रध्यापक आनन्द कुमारले गिरि नेपालको लोकतान्त्रिक र समाजवादी आन्दोलनको चेहरामात्रै नभएर भारतको समाजवादी आन्दोलनमा समेत भूमिका खेलेको बताउनुभयो ।
कार्यक्रममा पूर्व मन्त्रीहरु पदम नारायण चौधरी र मातृकाप्रसाद यादव, अजय शंकर नायक, सीतादेवी यादव मधेश प्रदेशका उद्योगमन्त्री सुनिता यादवले प्रदिप गिरिको सपना सकार गर्न वर्तमान सरकारले समाजवादी कार्यक्रम ल्याउनुपर्ने बताउनुभयो ।
लहान नगरपालिका प्रमुख महेशप्रसाद चौधरीले लहानमा प्रदिप गिरी मेडिकल कलेज र लहान नेपालटार प्रदिप गिरी मार्ग निर्माण गरी लहानको आर्थिक समृद्धिको लागि ध्यान आकर्षित गराउँदै स्वागत गर्नुभएको थियो ।
प्रदिप गिरिका पत्नी भारतीय सिलवालको अध्यक्षतामा गठित प्रदिप गिरि मेमोरियल ट्रष्टले आयोजना गरेको कार्यक्रमलाई सम्बोधन गर्नुभन्दा अगाडि प्रधानमन्त्री प्रचण्ड, अर्थमन्त्री महत र परराष्ट्रमन्त्री साउदले सामूहिक रुपमा वृक्षारोपण र गिरिले अध्ययन गर्नुभएको पुस्तकालयको निरिक्षण गर्नुभएको थियो ।