प्रधानमन्त्रीद्वारा एनपिएलको ट्रफी अनावरण; यस्तो छ एनपिएल ट्रफीको विशेषता
काठमाडौँ, मङ्सिर १० गते । नेपाल प्रिमियर लिग (एनपिएल) को ट्रफीको प्रधानमन्त्री केपी शर्मा ओलीले अनावरण गर्नुभएको छ । सुन्धारास्थित ऐतिहासिक धरहरा परिसरबाट सोमबार बिहान उहाँले ट्रफी अनावरण गर्नुभएको हो ।
यस्तो छ एनपिएल ट्रफीको विशेषता
नेपाली क्रिकेटको विकासले बिस्तारै अन्तर्राष्ट्रिय मञ्चमा पाइला टेक्दैछ । कमजोर संरचनाबिच दुई पटक आइसिसी टी-२० विश्वकपको यात्रा तय गरेको क्रिकेटलाई थप उचाइ दिने काम नेपाल क्रिकेट सङ्घ (क्यान) ले गरिरहेको छ ।
घरेलु क्रिकेट संरचनालाई बलियो बनाउन र खेलाडीलाई व्यावसायिक बनाउने उद्देश्यले क्यानको आयोजनामा यही मङ्सिर १५ गतेदेखि त्रिवि मैदानमा नेपाल प्रिमियर लिग (एनपिएल) को आयोजना हुँदैछ ।
विश्वका स्तरीय फ्रेन्चाइज लिगको अवधारणालाई पछ्याउन क्यानले आफ्नै अग्रसरतामा एनपिएल आयोजना गर्न लागेको हो । नेपालको भौगोलिक र सांस्कृतिक परिदृश्यलाई समेत समेट्ने गरी विभिन्न सहर र प्रदेशको नाममा आठ वटा फ्रेन्चाइज टोलीले एनपिएलमा प्रतिस्पर्धा गर्दैछन् ।
एनपीएलको माहौलसँगै साेमबार नेपालको सांस्कृतिक धरोहर धरहराबाट एनपिएल ट्रफीको प्रधानमन्त्री केपी शर्मा ओलीबाट अनावरण भएको छ । प्रधानमन्त्री ओलीले आठवटै टोलीका मार्की खेलाडीको रोहवरमा धरहरालाई साक्षी राखेर ट्रफीको अनावरण गर्नुभएको हो ।
क्यानले एनपिएललाई विश्वको सगरमाथा जस्तै उच्च बनाउन ट्रफीको टुप्पोमा सगरमाथा क्षेत्रस्थित कालापत्थरको ढुङ्गा राखेर थप महत्त्व बढाएको छ । ट्रफीको सार्वजनिकसँगै सामाजिक सञ्जालमा यसको चर्चा थप चुलिएको छ ।
एनपिएलका संयोजक एवं क्यानका सचिव पारस खड्काले नेपालको प्राकृतिक सम्पदा सगरमाथाको संरक्षण र प्रवर्धन गर्न विश्वमा सन्देश दिने उद्देश्यले ट्रफीमा कालापत्थरको ढुङ्गा राखिएको बताउनुभयो ।
‘‘सगरमाथाको काखमा रहेको कालापत्थरबाट ल्याइएको ढुङ्गा नै ट्रफीको मुख्य आकर्षण हो । यसले विश्व सम्पदाको सूचीमा रहेको संसारकै अग्लो सम्पदाको संरक्षण र प्रवर्धन गर्नेछ । साथै एनपिएलको माध्यमबाट पर्यटनमा सहयोग पुग्ने आशा राखेका छौँ,’’ पारसले भन्नुभयो । ट्रफीमा प्रयोग गरिएको ढुङ्गा पर्वतारोही निमा शेर्पा र मिङमा शेर्पाले कालापत्थर क्षेत्रबाट काठमाडौँ ल्याउनुभएको हो ।
क्यानका प्रवक्ता छुम्बी लामाकाअनुसार एनपिएल ट्रफीलाई सिम्बोलका रूपमा सगरमाथाको उचाइसरह ८८४८.८६ मिटर उचाइ दिइएको छ । करिब तीन किलो तौल रहेको ट्रफी भारतको मुम्बई सहरका कालीगढले बनाएका हुन् । साधारण धातु (मेटल) प्रयोग गरी बनाइएको यस ट्रफी रनिङ ट्रफीको रूपमा एनपिएलमा प्रयोग हुनेछ । क्यानले विजेतालाई यस्तै स्वरूपको प्रतिकृति (रिप्लिका) ट्रफी प्रदान गर्नेछ । क्यानले ट्रफीको लागत मूल्य भने खुलाएको छैन ।
आकर्षक ट्रफीको अनावरणसँगै नेपालको खेल पर्यटन, सांस्कृतिक धरोहर तथा नेपाली खेलकुदको पहिचान र गौरवको प्रतीकका रुपमा एनपिएलले थप उचाइ लिने क्यानको विश्वास छ ।
पुस ६ गतेसम्म सञ्चालन हुने एनपिएलमा कर्णाली याक्स, सुदूरपश्चिम रोयल्स, पोखरा एभेन्जर्स, जनकपुर बोल्ट्स, काठमाडौँ गुर्खाज, चितवन राइनोज, विराटनगर किंग्स र लुम्बिनी लायन्सले प्रतिस्पर्धा गर्नेछन् । उद्घाटन खेलमा विराटनगर र जनकपुरबिच भिडन्त हुनेछ ।