दुई महिलाकर्मी ‘एन पिस अवार्ड’ बाट सम्मानित
काठमाडौँ, २ मङ्सिर । पाँच वर्षदेखि एकल आमाको सम्पत्तिको अधिकार प्राप्तिमा सक्रिय अधिकारकर्मी शर्मिला थापा यस वर्षको ‘एन पिस अवार्ड’ बाट सम्मानित हुनु भएको छ ।
नेपाल पत्रकार मञ्चले आज यहाँ आयोजना गरेको पत्रकार सम्मेलनमा बोल्दै समिदा महिला विकास मञ्चको अध्यक्षसमेत रहनुभएकी थापाले महिला अधिकारका लागि निरन्तर सक्रियरूपमा लागेको भन्दै कात्तिक ६ गते संयुक्त राष्ट्रसङ्घीय विकास कार्यक्रमले आफ्नो कामको प्रशंसा गर्दै प्रोत्साहनवापत पुरस्कृत गरेको जानकारी दिनुभयो । अध्यक्ष थापाका अनुसार आफूलाई पनि एउटा छोराको जन्मपछि श्रीमान्ले छोडेर समस्याको जीवन बिताउनु परेकाले आफू अन्य महिलालाई सहयोग होस् भनी संस्था सञ्चालन गरेको बताउनुभयो ।
हाल उहाँको संस्थामा २८६ जना एकल आमालाई सहयोग गरी मञ्चले ती आमालाई आत्मनिर्भरका लागि कागजको फूल बनाउने, सिलाइकटाइ र बुनाइलगायतका सीप सिकाइरहेको छ । यस संस्थाले विशेष गरी एकल बनेका आमाको सम्पत्तिको अधिकारका लागि यहयोग गर्दै आएको छ । यो पुरस्कार हरेक वर्ष दिने गरिन्छ ।
शान्ति र समानताका लागि निरन्तर लाग्नुभएकी अर्की समाजसेवी कौशीला चौधरी पनि यस वर्ष सोही पुरस्कारबाट सम्मानित हुनुभएको छ । रासस