हिसानको छयालीसबुँदे घोषणापत्र सार्वजनिक
काठमाडौँ, ३ जेठ । उच्चमाध्यमिक विद्यालय सङ्घ नेपाल (हिसान) ले तत्काल राष्ट्रिय शिक्षा आयोग गठनको माग गर्दै ४६ बँुदे घोषणापत्र सार्वजनिक गरेको छ ।
हिसानको सातौँ राष्ट्रिय महाधिवेशनले शिक्षा क्षेत्रका विभिन्न विषय समेटिएर पारित गरेका ४६ बुँदे घोषणापत्र नवनिर्वाचित अध्यक्ष रमेश सिलवालले आज पत्रकार सम्मलेनमार्फत सार्वजनिक गर्दै कक्षा ११ र १२ को परीक्षाको परीक्षाफल प्रकाशन गर्दा ७५ प्रतिशत ल्याउनेलाई विशिष्ट, ६० प्रतिशतलाई प्रथम श्रेणी, ४५ प्रतिशतलाई द्वितीय र ३५ प्रतिशतलाई तृतीय श्रेणी खुलाउनुपर्ने माग गर्नुभयो ।
यस्तै दश जोड दुईलाई कम्तीमा १० वर्ष सञ्चालन गर्न दिनुपर्ने र शिक्षा क्षेत्रमा लगाइएको १ प्रतिशत शिक्षा सेवा शुल्क खारेज गर्नुपर्ने माग गरिएको छ ।
अध्यक्ष सिलवालले शिक्षा क्षेत्रमा आएका चुनौती समाधान गर्न सरकार निजी क्षेत्रसँग सहकार्य गर्दै अघि बढ्नुपर्नेमा जोड दिँदै अहिले सरकारले ल्याउन थालेको शिक्षा ऐनको मस्यौदा अव्यावहारिक भएकाले सच्याउनुपर्ने बताउनुभयो । “सरकारले ल्याउन लागेको शिक्षा ऐन संविधानसँग बाझिएको छ”, उहाँले भन्नुभयो, “सङ्घीय संरचनाको आधारमा ऐन ल्याउनुपर्छ ।” हिसानको महाधिवेशन गत वैशाख ३० र ३१ भएको थियो ।
तेस्रो एडुफेयर बिहीबारदेखि
बिहीबारदेखि प्रदर्शनीमार्गस्थित भृकुटीमण्डपमा तेस्रो कान्तिपुर हिसान एडुफेयर–२०१६ हुने भएको छ । हिसान र कान्तिपुर पब्लिकेसन्सको संयुक्त आयोजनामा चार दिनसम्म एजुफेयर विद्यार्थी र अभिभावकलाई एउटै छानामुनि नेपालका कजेजको जानकारी गराउने उद्देश्यले आयोजना गर्न लागिएको अध्यक्ष सिलवालले बताउनुभयो ।
मेलामा नेपालका उत्कृष्ट सय कलेजको सहभागिता हुने हिसानका वरिष्ठ उपाध्यक्ष युवराज शर्माले जानकारी दिनुभयो । एजुफेयरमा निःशुल्क प्रवेशको व्यवस्था गरिएको छ । शर्माका अनुसार एडुफेयरमा हरेक दिन गोलाप्रथाबाट उच्च शिक्षा अध्ययनका लागि निशुल्क छात्रवृत्ति दिइने छ । रासस
