समानुपातिक तर्फ ५२ दलले प्रतिस्पर्धा गर्ने
काठमाडौँ, असोज २९ गते । आसन्न प्रतिनिधिसभा र प्रदेशसभा सदस्य निर्वाचनको समानुपातिक प्रणाली तर्फ ५२ वटा दलले प्रतिस्पर्धा गर्ने भएका छन् ।
समानुपातिक तर्फको निर्वाचनमा सहभागि हुन ८८ वटा दलले दर्ता गराएपनि उम्मेदवारको बन्दसूची बुझाउने दिन आज ३४ वटा दल भने अनुपस्थित रहे । निर्वाचन आयोगले वन्दसुची बुझाउने समय विहान १० देखि साँझ ५ बजेसम्म तोके पनि सो समय भित्र धरौटी बापतको शुल्क बुझाउँदै फारम लिएका दलले बन्दसूची बुझाउने क्रम अहिले पनि जारी रहेको निर्वाचन आयोगले जनाएको छ ।
५२ वटा दलले मात्र निर्वाचनका लागि दस्तुर बुझाएका हुन् । नेपाली कांग्रेस, एमाले, माओवादी केन्द्र, राजपा नेपाल, संघीय समाजवादी फोरम नेपाल, राप्रपा प्रजातान्त्रिक, राप्रपा, फोरम लोकतान्त्रिक लगायत दलले बन्दसूची बुझाउन आवश्यक प्रक्रिया पुरा गरेका छन् । नेता बर्षमान पुनको नेतृत्वमा माओवादी केन्द्रले बन्दसूची बुझाएपनि कांग्रेस र एमाले नेताहरु भने निर्वाचन कार्यालयमै नामावलीलाई अन्तिम रुप दिने गृहकार्यमा छन् । दलहरुको सुस्तताका कारण बन्दसूची बुझाउने क्रम अवेरसम्म चल्ने आयोग प्रवक्ता नवराज ढकालले जानकारी दिनुभयो । प्रमुख दलहरु बन्दसूचीलाई अन्तिम रुप दिन दिनभर छलफलमा ब्यस्त भएपछि अवेरमात्र निर्वाचन कार्यालय पुगेकाले सूची बुझाउन समय लाग्ने ढकालको भनाई छ । समानुपातिक तर्फ प्रतिनिधिसभामा १ सय १० र ७ वटा प्रदेशसभाका लागि २ सय २० जना सदस्य चुनिनेछन् । प्रतिनिधिसभा निर्वाचनका लागि बढीमा १ सय १० जना र कम्तीमा ११ जनाको नाम बुझाउनु पर्ने आयोगले जनाएको छ । ५० प्रतिशत महिला अनिवार्य गरिएको निर्देशिकामा जनसंख्याको आधारमा खसआर्य ३१ दशमलब २, आदिवासीजनजाती २८ दशमलब ७, मधेशी १५ दशमलब ३, दलित १३ दशमलब ८, थारु ६ दशमलब ६ र मुस्लिम ४ दशमलब ४ प्रतिशत हुनु पर्ने व्यवस्था छ ।
राजनीतिक दलले प्रतिनिधिसभा र प्रदेशसभा सदस्यका लागि छुट्टाछुट्टै बन्दसूची आयोगको कार्यालयमा बुझाउनु पर्नेछ । प्रदेशसभाको हकमा प्रदेशपिच्छे छुट्टाछुट्टै बन्दसूची हुनुपर्नेछ । प्रवक्ता ढकालले प्रतिनिधिसभा र ७ वटै प्रदेशसभाका लागि समानुपातिक तर्फको बन्दसूची बुझ्न आयोगमा छुट्टै डेस्क स्थापना गरेको जानकारी दिनुभयो । समानुपातिक तर्फको बन्दसूचीमा परेका व्यक्ति प्रत्यक्ष तर्फ उम्मेदवार हुन पाउने छैनन् । प्रदेश र प्रतिनिधि सभाको निर्वाचनको मिति आगामी मंसिर १० र २१ गते गरी दुई चरणमा तोकिएको छ ।