गणतन्त्र, राष्ट्रियता र धर्मनिरपेक्षताविरुद्ध खतरा उत्पन्न भयो : राष्ट्रिय जनमोर्चा
राष्ट्रिय जनमोर्चाले सरकारप्रतिको असन्तोषका कारण गणतन्त्र, राष्ट्रियता र धर्मनिरपेक्षतामाथि नै गम्भीर खतरा उत्पन्न भएको बताएको छ । ३१ र ३२ साउनमा बसेको पार्टीको केन्द्रीय समिति बैठकका निर्णय सार्वजनिक गर्दै सो पार्टीले जनआन्दोलनका मुख्य उपलब्धिको रक्षा गर्नुपर्ने बताएको हो ।
पत्रकार सम्मेलनमा पार्टी अधयक्ष चित्रबहादुर केसीले पूर्वराजा, राजावादी र कांग्रेस नेताहरूले समेत धर्मनिरपेक्षताको विरोध गरेको बताए । सरकारले सही ढंगले काम गर्न नसकेकाले राजतन्त्र पुनस्र्थापना हुन सक्ने खतरा देखिएको केसीले बताए ।
‘धर्मनिरपेक्षता समाप्त भए नेपाल हिन्दूराष्ट्र घोषणा हुनेछ र त्यस आधारमा राजतन्त्र पुनर्स्थापना हुन सक्ने खतरा छ,’ केसीद्वारा जारी विज्ञप्तिमा भनिएको छ, ‘तर, जनताको संगठित आवाजबाट प्रतिगमन दोहोरिन नदिन हामी प्रतिबद्ध छौँ ।’
वामपन्थी दलको गणतन्त्र र संविधानविरुद्धका नीति र गतिविधिले प्रतिगमनलाई मद्दत पुग्ने बताउँदै सो पार्टीले नेपालको राष्ट्रियता, राष्ट्रिय एकता, अखण्डता र सार्वभौमसत्तामाथि संघीयताका कारणले खतरा उत्पन्न भएको जनाएको छ । भ्रष्टाचार, नागरिकता समस्या, महँगी, करवृद्धि, तराईमा भएको शोषण, उत्पीडन, मजदुर, किसान, महिला, जनजाति, उत्पीडित जातिलगायत विभिन्न जनवर्ग र समुदायका समस्या पनि विकराल बन्दै गएको पार्टीको ठहर छ ।