इलाम, ३० असोज । महिला बालबालिका कार्यालय, इलामले गत आव २०७१÷७२ मा ४२१ जनालाई अपाङ्ग परिचय पत्र वितरण गरेको छ ।

कार्यालयले पूर्णअशक्त २१ महिला र ३१ पुरूषलाई रातो कार्ड, अतिअशक्त ५० महिला र ८५ पुरूषलाई नीलो कार्ड, मध्यम अपाङ्ग ५१ महिला र ७७ पुरूषलाई पहँेलो कार्ड र सामान्य अपाङ्ग ५२ महिला र ३४ पुरूषलाई सेतो कार्ड वितरण गरेको कार्यालय प्रमुख स्कीम श्रेष्ठले जानकारी दिनुभयो ।

सबै काममा अरूकै भरपर्ने विशेष गरी तीव्र वौद्धिक अपाङ्गता, शारीरिक रूपमा हातखुट्टाले काम गर्न नसक्नेलाई पूर्णअशक्तको सूचीमा राखेर रातो कार्ड दिइन्छ । पूर्ण अपाङ्गले सरकारबाट मासिक रू एक हजार र अति तथा आंशिक अपाङ्गले रू तीन सयका दरले भत्ता पाउँछन् ।

कार्यालयबाट हालसम्ममा दुई हजार ९१० जनालाई अपाङ्ग परिचय पत्र वितरण गरिसकेको छ । विसं २०६८ को जनगणनाअनुसार इलाममा अझैपनि पाँच हजार जना अपाङ्गता भएका व्यक्ति परिचय पत्र लिनबाट वञ्चित भएको राष्ट्रिय अपाङ्ग महासङ्घ जिल्ला शाखा इलामले जनाएको छ ।

जुनसुकै प्रकारका अपाङ्गता भएका व्यक्तिले पनि रातो परिचय पत्र लिन खोज्नु, अपाङ्गता भएका व्यक्ति परिचय पत्रका लागि सम्बन्धित निकायसम्म नआउनुजस्ता कारणले धेरै जना परिचय पत्र लिनबाट वञ्चित भएका हुन् ।

कार्यालयसम्म आउन नसक्ने अशक्तहरूलाई गाउँ–गाउँमा सञ्चालित घुम्ती शिविरमार्फत परिचय पत्र वितरण गरिएको थियो । गतवर्ष जिल्लाका महमाई, घुर्विसे पञ्चमी, माइमझुवा, श्रीअन्तुलगायतका जिल्लाका विभिन्न स्थानमा घुम्ती शिविरमार्फत परिचय पत्र वितरण गरिएको थियो । रासस