थोराङ पासमा आवास गृह बनेपछि पर्यटकलाई सुविधा
मुस्ताङ, १ कात्तिक । राउण्ड अन्नपूर्ण पदमार्गअन्र्तगत थोराङ पासमा अस्थायी सेल्टर (आवास गृह) निर्माण भएपछि पर्यटकलाई सहज भएको छ ।
जिल्ला विकास समिति मुस्ताङ र पर्यटन बोर्डको ४० लाख रुपैयाँको लगानीमा गत असार महिनामा सेल्टर निर्माण गरिएको हो । एक्काइस दिन लाग्ने पदमार्गको पदयात्रामा आउने अधिकाँश पदयात्रीहरु समुद्री सतहदेखि पाँच हजार चार सय मिटर उचाईमा रहेको थोराङ पास पुग्न चाहन्छन् ।
मनाङ र मुस्ताङको सिमाना पर्ने थोराङ क्षेत्रमा आवश्यकताका आधारमा दुईवटा सेल्टर निर्माण गरिएपछि यो याममा आउने पदयात्रीलाई सहज भएको जिल्ला विकास समितिका कार्यक्रम अधिकृत केदारसिंह थापाले बताउनुभयो । पर्यटकलाई विश्राम, आवश्यक लत्ताकपडा र खाद्यान्न राख्न तथा प्रतिकूल मौसमको समयमा बास बस्न मिल्ने भएपछि पर्यटक उत्साहित भएको उहाँको भनाइ छ ।
उहाँले भन्नुभयो – “दुई वटा आवासगृह बनेपछि अहिले पर्यटकलाई धेरै फाइदा पुगेको छ । त्यहाँ बास बस्ने पदयात्रीको बढ्दै गएका छन् ।” गतवर्षको असोज अन्तिम सातातिर भएको हिमपातले थोराङ क्षेत्रमा मात्रै विदेशी पर्यटक र नेपाली पथप्रदर्शक तथा भरिया गरी २५ जना भन्दा बढीले ज्यान गुमाएका थिए ।
आँधीको प्रभावका कारण दुईदिनसम्म लगातार हिउँ परेपछि मनाङ हुँदै आएका पर्यटकको अत्यधिक चिसोले कठङ्ग्रिएर मृत्यु भएका थिए । लामो समयदेखि सेल्टर निर्माण गर्नुपर्ने बहस चलेपनि प्रक्रिया अघि नबढ्दा गतबर्ष ठूलो मानवीय क्षति भएको थियो ।
अहिले सेल्टर बनेपछि हिमपातकै कारणले यस्तो मानवीय क्षति नहुने एक्याप जोमसोमका प्रमुख विदुर कुइँकेलले जानकारी दिनुभयो । बोर्ड तथा मन्त्रालयले पक्की घर नै बनाउन भनेर बजेट दिएको भएपनि तत्काल सम्भब नभएका कारण टिन र फलामको सहायताले अस्थायी गृह निर्माण गरिएको जिविसले जनाएको छ । “पर्यटकहरुले पनि ठीक ठाउँमा सेल्टर बनेको छ भनेर प्रतिक्रिया आएको छ, अझै त्यसलाई व्यवस्थित बनाउनुपर्नेछ,” प्रमुख कुइँकेलले भन्नुभयो । रासस