सङ्क्रमित आमाबाट जन्मिने शिशुमा एड्स सर्न नदिन कार्यक्रम ; पाल्पामा १३६ जना सङ्क्रमितले एआरटी सेवा लिँदै
कञ्चनपुर, २९ कात्तिक । कञ्चनपुरमा सञ्चालनमा रहेका बर्थिङ सेन्टरमा सङ्क्रमित आमाबाट जन्मिने शिशुमा एचआइभी एड्सको सङ्क्रमण हुन नदिनका लागि कार्यक्रम सञ्चालन गरिएको छ । जिल्लाका सबै स्वास्थ्य संस्थाको बर्थिङ सेन्टरमा कार्यरत ८० जना स्वास्थ्यकर्मीलाई यसबारे तालिम प्रदान गरी दक्ष बनाइएको छ ।
एचआइभी एड्सबाट सङ्क्रमित आमा गर्भवती भएमा नियमित चेकजाँचका क्रममा औषधि सेवन गराई शिशुलाई सुरक्षित गर्नका लागि कार्यक्रम सञ्चालन गरिएको जनस्वास्थ्य कार्यालय कञ्चनपुरका जनस्वास्थ्य निरीक्षक रतनबहादुर विष्टले बताउनुभयो ।
“स्वास्थ्य संस्थामा गर्भवती चेकजाँचका क्रममा आउने आमा सङ्क्रमित भए नभएको बारे तालिम पाएका दक्ष स्वास्थ्यकर्मीले यकिन गरी महाकाली अञ्चल अस्पतालबाट औषधि उपलब्ध गराई सुरक्षित तरिकाले सुत्केरी गराउने व्यवस्था मिलाएका छौँ” – उहाँले भन्नुभयो ।
सङ्क्रमित भएका आमाले नियमित औषधि सेवन गरे जन्मिने शिशुमा सङ्क्रमणको असर नहुने उहाँले बताउनुभयो । औषधि सेवन गर्ने सङ्क्रमित आमाले जन्माएका ८० प्रतिशत शिशु स्वस्थ्य जन्मिने बताइएको छ ।
हालसम्म औषधि सेवन गरेका यहाँका सङ्क्रमित चारजना आमाबाट स्वस्थ्य शिशु जन्मिएको उहाँले जानकारी दिनुभयो । उहाँका अनुसार कञ्चनपुरमा ३३४ जना एचआइभी एड्सबाट सङ्क्रमित रहेका छन् । सबैभन्दा बढी यौनकर्मी महिलाका कारण सङ्क्रमितको सङ्ख्या बढ्दो रुपमा रहेको छ ।
युनाइटेड मिसन अस्पताल तानसेनबाट १३६ जना एचआइभी सङ्क्रमितले एआरटी सेवन लिदै आएका छन् । एआरटी नामक औषधि नियमित रुपमा सेवन गर्दा एचआइभी सङ्क्रमितलाई स्वास्थ्य रहन सहयोग गर्छ ।
एआरटी सेवन गर्नेमध्ये ७७ जना सङ्क्रमित महिला र ५९ जना पुरुष रहेका छन् । पाल्पामै एचआइभी जीवाणु परीक्षण (एआरभी) हुन थालेपछि सङ्क्रमितको पहिचान र उपचार सहज भएको जिल्ला स्वास्थ्य कार्यालयका वरिष्ठ जनस्वास्थ्य अधिकृत राजेन्द्रप्रसाद घिमिरेले जानकारी दिनुभयो ।
जनस्वास्थ्यका अनुसार पाल्पा जिल्लामा चार वर्षअघि ८६ जना एचआइभी सङ्क्रमित रहेका थिए । उक्त सङ्ख्या बढेर गत वर्ष २३७ जना र यो वर्ष २६६ जना पुगेको छ ।
दुई सय ६६ जना सङ्क्रमितमध्ये ६६ जना एकल महिला छन् । बढ्दो वैदेशिक रोजगारी, सामाजिक चेतना र सङ्क्रमितलाई उपचार र सहयोगले समेत सङ्क्रमितहरू बाहिर आउने क्रम बढेको उहाँले बताउनुभयो । यसअघि बालबालिका कम प्रभावित भए पनि पछिल्लो समयमा बालबालिकामा समेत एचआइभी सङ्क्रमण देखिएको छ । रासस