मुस्ताङमा जलवायु परिवर्तन अनुकूलन योजना लागू
मुस्ताङ, ७ जेठ । हिमाली जिल्ला मुस्ताङका १६ वटै गाविसमा जलवायु परिर्वतनले स्थानीयस्तरमा पारेको असर अध्ययन र न्यूनीकरणका लागि जलवायु परिर्वतन अनुकूलन योजना लागू भएको छ ।
जिल्ला विकास समिति, जिल्ला भू–संरक्षण कार्यालय, बहुसरोकारवाला वन कार्यक्रम, हरियो वन कार्यक्रम, अन्नपूर्ण संरक्षण क्षेत्र आयोजना (एक्याप) र मानव विकास तथा वातावरण सरोकार समाजलगायत सङ्घसंस्थाको पहलमा योजना लागू भएको हो ।
हिमाली क्षेत्रमा जलवायु परिर्वतनका कारण हिमताल फुट्ने, नदीनाला र पानीका मुहान सुक्दै जाने, कृषि उत्पादनमा ह्रास, हिउँ पर्ने क्रममा कमीजस्ता समस्या देखिएको भन्दै योजना लागू भएपछि त्यसको न्यूनीकरणको उपायका विषयमा स्थानीवासीसँग सहकार्य गरिनेछ ।
एक अध्ययनअनुसार, औद्योगीकरणको विकाससँगै बढेको जलवायु परिर्वतनको असर हिमाली क्षेत्रमा बढी देखिएका छन् । स्थानीय विकास अधिकारी हरिप्रसाद बाँस्तोलाले अनुकूलन योजना लागू भएपछि स्थानीयस्तरमा चेतनामूलक कार्यक्रम, वृक्षरोपण र मौसमअनुसारका खेतीबाली लगाउन किसानलाई प्रोत्साहन गरिने जानकारी दिनुभयो ।
जिल्लाको जोमसोम, कोबाङ, टुकुचे, कुञ्जो र छोसेर गाविसमा अनुकूलन योजना कार्यान्वयन गर्न थालिएको छ भने बाँकी गाविसमा पनि कार्यान्वयनका लागि स्थानीयस्तरमा छलफल गरिएको छ ।
पश्चिमाञ्चल क्षेत्रीय वन कार्यालयका निर्देशक शान्तमणि ताम्राकारले जलवायु परिवर्तनको असरबाट बच्न यस्ता कार्यक्रम सहयोगी हुने बताउनुभयो ।
जिल्लाको गाउँगाउँमा खानेपानीको मुहान सुक्दै जानु, तल्लो भेगमा उत्पादन हुने स्याउ विस्तारै नाश हँुदै जान थालेकाले स्थानीयवासी समस्यामा परेका छन् । रासस