बुद्ध जयन्ती समारोह ः तयारी पूरा, अतिथि आउने क्रम सुरु
दीपक घिमिरे / (रुपन्देही), ७ जेठ । विश्व शान्तिको मुहान, भगवान् शाक्यमुनि गौतमबुद्धको जन्मस्थल लुम्बिनीमा भोलि शनिबार आयोजना गर्न लागिएको २५६०औँ बुद्धजयन्ती तथा लुम्बिनी दिवसमा सहभागी हुन विदेशी तथा स्वदेशी पाहुना आउने क्रम सुरु भएको छ ।
बुद्ध जयन्तीमा भाग लिन चीन, श्रीलङ्का, भारत, थाइल्यान्ड, अमेरिका, अस्टेलिया, बर्मा, मङ्गोलियालगायतका देशबाट बुद्धमार्गी भिक्षु, भिक्षुणी, लामा गुरु, बज्रयानी बौद्ध गुरु, उपासक र उपासिका लुम्बिनी आइपुग्नु भएको छ ।
लुम्बिनी आइपुग्नु भएका अधिकांश विदेशी पाहुना हवाई मार्ग हुँदै लुम्बिनी आउनुभएको हो । कतिपय पाहुना सडक मार्गबाट लुम्बिनी आउनुभएको लुम्बिनी विकास कोषले जानकारी दिएको छ ।
कोषले दिएको जानकारीअनुसार भुटान, रसिया, संयुक्त राष्ट्र सङ्घका प्रतिनिधि तथा अन्य मुलुकका मन्त्री तथा पाहुना आउने क्रम जारी रहेको कोषका सदस्य सचिव अजितमान तामाङले जानकारी दिनुभयो । उहाँका अनुसार कार्यक्रममा सहभागी हुन गृह मन्त्री, संस्कृति, पर्यटन तथा नागरिक उड्डयन मन्त्री र मुख्य सचिव साँझ लुम्बिनी आइपुग्नु भएको छ ।
कार्यक्रममा सहभागी हुन थाइल्यान्डका पर्यटन मन्त्री लुम्बिनी आउने पक्का भएको कोषका सदस्य सचिव तामाङले जानकारी दिनुभयो । भोलि बिहानसम्म पनि पाहुना आउने क्रम जारी रहने उहाँले उल्लेख गर्नुभयो ।
राष्ट्रपति भण्डारी लुम्बिनीमा
२५६० औँ बुद्ध जयन्तीको औपचारिक कार्यक्रममा सहभागी हुन राष्ट्रपति विद्यादेवी भण्डारी लुम्बिनी आइपुग्नु भएको छ । भोलि बिहान १० बजेदेखि सुरु हुने बुद्ध जयन्तीको औपचारिक कार्यक्रममा उहाँ प्रमुख अतिथिका रुपमा सहभागी हुनुहुनेछ । उहाँलाई कोषका पदाधिकारीले मायादेवी मन्दिरको प्रवेशद्वार अगाडि स्वागत गरेका थिए ।
नेपाली ध्वजाबाहक विशेष हेलिकप्टरबाट बिहान ११ बजे लुम्बिनी आइपुग्नुभएको राष्ट्रपति भण्डारीले झन्डै ४५ मिनेट लुम्बिनीस्थित मायादेवी मन्दिरमा बिताउनुभएको थियो । उहाँले मायादेवी मन्दिरमा पूजाआजा पनि गर्नुभयो ।
त्यसपछि उहाँ मायादेवी परिसरमा आयोजित अनौपचारिक कार्यक्रममा सहभागी हुनुभएको थियो । सो कार्यक्रममा रुपन्देहीका प्रमुख जिल्ला अधिकारी विष्णुप्रसाद ढकालले लुम्बिनीको पुरातात्विक महत्वका बारेमा राष्ट्रपति भण्डारीलाई जानकारी गराउनुभएको थियो भने कोषका सदस्य सचिव तामाङले लुम्बिनी गुरुयोजनाका विषयमा जानकारी गराउनुभएको थियो । राष्ट्रपति भण्डारीका साथमा पर्यटन तथा संस्कृति सचिव प्रेम राई र क्षेत्रीय प्रशासक शङ्कर कोइराला हुनुहुन्थ्यो । लुम्बिनीमा भएको कार्यक्रमपछि राष्ट्रपति भण्डारी कपिलवस्तुको तिलौराकोट र नवलपरासीको रामग्राम पुग्नुभएको थियो ।
लुम्बिनीमा बुद्ध जयन्तीको तयारी पूरा
लुम्बिनीमा आयोजना गर्न लागिएको २५६० औँ बुद्ध जयन्ती एवम् लुम्बिनी दिवस २०७३ को तयारी पूरा भएको छ ।
‘लुम्बिनी नेपाल ः भगवान् बुद्धको जन्मस्थल एवम् बुद्ध धर्मको उद्गमस्थल’ भन्ने मूल नाराका साथ मनाउन लागिएको बुद्ध जयन्ती तथा लुम्बिनी दिवसको तयारी अन्तिम पूरा भएको कोषले जानकारी दिएको छ ।
लुम्बिनीस्थित लुम्बिनी सङ्ग्रहालय नजिक आयोजना गरिने धार्मिक कार्यक्रममा एक हजार जना लामा गुरु सहभागी हुने क्रम सुरु भएको लुम्बिनी विकास कोषका सदस्य सचिव तामाङले जानकारी दिनुभयो ।
भोलि आयोजना हुने कार्यक्रमका लागि लुम्बिनीलाई निकै आकर्षक ढङ्गले सजाइएको छ । विगतको भन्दा निकै महत्वका साथ हेरिएको यस पटकको बुद्ध जयन्तीलाई भव्यरुपमा सफल पार्न लुम्बिनीको सरसफाइदेखि सुरक्षासम्म निकै ध्यान दिइएको छ । लुम्बिनी जाने बाटोमा विभिन्न ठाउँमा स्वागत द्वार निर्माण गरिएको छ भने विभिन्न स्थानमा नेपालको राष्ट्रिया झण्डा र बौद्ध झन्डा फहराइएका छन् । लुुम्बिनीस्थित मायादेवी मन्दिर, शान्ति दीप, कार्यक्रम स्थललाई बेहुलीजस्तै सझाइएको छ ।
सुरक्षा व्यवस्था कडा
भोलिका कार्यक्रमलाई ध्यानमा राखेर सरकारले दरिलो सुरक्षा व्यवस्था मिलाएको छ । राष्ट्र प्रमुख सहभागी हुने कार्यक्रमलाई भव्यरुपमा सम्पन्न गर्न आवश्यक सम्पूर्ण सुरक्षा प्रबन्ध मिलाइएको क्षेत्रीय प्रशासक कोइरालाले जानकारी दिनुभयो । कार्यक्रम अवधिभर नेपाल प्रहरी, नेपाली सेना, सशस्त्र प्रहरी, राष्ट्रिय अनुसन्धान तथा ट्राफिक प्रहरीले सुरक्षा दिने उहाँले जानकारी दिनुभयो । विदेशी पाहुनाका लागि पनि सुरक्षा प्रबन्ध मिलाइएको छ । रासस