प्रधानमन्त्रीका लागि प्रचण्डको मात्र उम्मेदवारी
काठमाडौं, १८ साउन । प्रधानमन्त्रीका लागि नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को मात्र उम्मेदवारी परेको छ ।
प्रधानमन्त्रीको उम्मेदवार दर्ताका लागि सोमबार विहान ११ बजेदेखि ४ बजेसम्मको समय तोकिएको थियो । तर, प्रचण्डको मात्र उम्मेद्वारी परेको संसद सचिवालयका सहप्रवक्ता सुदर्शन कुइँकेलले जानकारी दिए ।
प्रचण्डले विहान ११ बजेर २५ मिनेटमा समर्थक दलका नेताहरुसहित उम्मेद्वारी दर्ता गरेका थिए । उनको प्रस्तावकमा कांग्रेस सभापति शेरबहादुर देउवा छन् भने समर्थकमा कृष्णबहादुर महरासहितका नेताहरु छन् ।
मधेसी मोर्चाका नेताहरू उपेन्द्र यादव, सर्वेन्द्रनाथ शुक्ला र लक्षमणलाल कर्ण पनि समर्थक छन् । यद्यपि कांग्रेस, माओवादी र मधेसी मोर्चासहितको संघीय गठवन्धनबीच भने लिखित सहमति हुन सकेको छैन ।
दिनभर छलफल भएपनि सहमति जुटेन । भोलि विहानसम्म सहमति नभए प्रचण्डलार्इ मत नदिने मोर्चाका नेताहरूले बताएका छन् ।
एमालेले प्रधानमन्त्री पदका लागि उम्मेद्वारी नदिने
नेकपा एमालेले प्रधानमन्त्री पदका लागि उम्मेद्वारी नदिने भएको छ । आज प्रधानमन्त्री निवास बालुवाटरमा बसेको स्थायी समितिको बैठकले सो निर्णय गरेको हो ।
एमाले सचिव गोकर्ण विस्टले बैठकको निर्णय बारे जानकारी दिँदै पार्टीले प्रधानमन्त्रीका लागि उम्मेद्वारी नदिने तर विपक्षमा मतदान गर्ने बताए । उनले एमालेले प्रतिपक्षमा बस्ने निर्णय गरेको बताए ।
एमालेका प्रचार विभाग प्रमुख योगेश भट्टराईले पार्टी प्रतिपक्षमा बस्ने भएको र संविधान कार्यान्वयनका लागि भविष्यमा सहकार्य आवश्यक भएकाले पार्टीले प्रधानमन्त्रीको उम्मेद्वार खडा नगर्ने निर्णय गरेको जानकारी दिए । एमालेले आफ्नो सहमतिविना ल्याइने संविधान संशोधनको प्रस्तावलाई फेल गराउने निर्णय पनि गरेको छ ।