अस्ट्रेलियाको एनएडिएफ अध्यक्षमा थापा ; देवकोटा अस्ट्रेलियाका लागि पर्यटनदूत
काठमाडौँ, २९ साउन । नेप्लिज अस्ट्रेलियन डेमोक्रेटिक फोरम (एनएडिफ)ले नवौँ अधिवेशनले नयाँ कार्यसमितिको अध्यक्षमा विवेक थापालाई सर्वसम्मत रुपमा चयन गरेको छ ।
अस्ट्रेलियाको नेपाली समुदायमा करिब दुई दशकदेखि रहँदै आएको यस संस्थाले ओबनको साइनो नेपाली रेस्टुरेन्टमा सर्वसम्मत नयाँ कार्यसमितिसमेत चयन गरेको हो ।
संस्थाको उपाध्यक्षद्वयमा पूर्णनाथ घिमिरे र सुरेन्द्र सापकोटा, महासचिवमा माधव गैरे, सचिवमा थानु शाक्य, कोषाध्यक्षमा सत्यप्रकाश कँडेल, पब्लिक अफिसरमा अर्जुन केसी, युवा संयोजकमा रामजी बस्नेत सर्वसम्मत चयन गरेको छ ।
नयाँ समितिलाई बधाई दिँदै गैरआवासीय नेपाली सङ्घ (एनआरएन) अस्ट्रेलियाका अध्यक्ष सुरेन्द्र सिग्देलले दुई वर्षको कार्यकाल सफल भएकामा निवर्तमान हुँदै गरेको समितिलाई धन्यवाद दिँदै नवनिर्वाचित समितिलाई बधाई दिनुभयो ।
प्रजातान्त्रिक विचार राख्नेहरु सम्मिलित वैद्धिक समुदायको सहभागिता रहेको यस संस्थाले वैचारिक मन्थन गर्दै नेपाल र नेपालीका लागि परोपकारी कार्य गर्दै आएको छ ।
हाल अस्ट्रेलियाको भिक्टोरियामा बसोबास गरिरहनुभएका नेपाली पत्रकार चिरञ्जीवीराज देवकोटालाई नेपाल पर्यटन बोर्डले मानार्थ पर्यटनदूत नियुक्त गरेको छ ।
उहाँलाई अस्ट्रेलियाको भिक्टोरिया राज्यका लागि दुई वर्षका लागि अवैतनिक पर्यटनदूत नियुक्त गरिएको नेपाल पर्यटन बोर्डले जनाएको छ । नेपालको पर्यटन विकासको कार्यलाई अस्ट्रेलियामा तीव्रता दिने उद्देश्यका साथ बोर्डले उहाँलाई पनि भिक्टोरिया राज्यका लागि दूतका रुपमा नियुक्त गरेको हो ।
उहाँलाई नेपाल पर्यटन बोर्डको प्रतिनिधिका रुपमा अस्ट्रेलियामा विभिन्न कार्यक्रममा सहभागी हुनाका साथै त्यहाँका पर्यटनसम्बन्धी निकायसँग समन्वय गरी नेपालमा अस्ट्रेलियाली पर्यटकको सङ्ख्या वृद्धि गर्नुपर्ने कार्यादेश तोकिएको छ ।
आमसञ्चार तथा पत्रकारिता विषयमा स्नातकोत्तर देवकोटा हाल अस्ट्रेलियाबाट प्रसारण भइरहेको नेपाली भाषाको टेलिभिजन ‘एमएनटिभी’ प्रधानसम्पादक हुनुुहुन्छ । उहाँ केही समयअघिसम्म नेपालको ‘न्युज २४’ टेलिभिजनको समाचार प्रमुखका रुपमा कार्यरत हुनुहुन्थ्यो । रासस