पुरातात्विक सम्पदाको महत्वलाई विशेष ध्यान दिनुपर्छ : राष्ट्रपति भण्डारी
काठमाडौँ, ९ कात्तिक । राष्ट्रपति विद्यादेवी भण्डारीले भूकम्पबाट क्षति पुगेका संरचनाहरुको पुनर्निर्माणका क्रममा ऐतिहासिक र पुरातात्विक सम्पदाहरुको महत्वलाई विशेष ध्यान दिन सुझाव दिनुभएको छ ।
राष्ट्रपति कार्यालय शीतलनिवासमा पुनःनिर्माणसम्बन्धी आज भएको छलफलमा राष्ट्रपति भण्डारीले पुनःनिर्माण गर्दा स्थानीय जनताको चाहना र भावनालाई सम्बोधन गरेर अघि बढ्न समेत सुझाव दिनुभयो ।
उहाँले स्थानीय सामग्रीलाई प्राथमिकता दिँदै परम्पारगत शैलीमा पुनर्निर्माणका कामहरुलाई अघि बढाउनुपर्नेमा जोड दिनुभएको प्राधिकरणद्वारा जारी विज्ञप्तिमा उल्लेख छ ।
कार्यक्रममा राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले पुनर्निर्माणमा अहिलेसम्म भएका प्रगति, देखा परेका समस्या तथा चुनौती र भावी योजनाबारे जानकारी गराउनुभयो ।
यसैगरी सहरी विकास मन्त्रालयअन्तर्गतका केन्द्रीय आयोजना कार्यान्वयन इकाइ प्रमुख शिवहरि शर्मा, पयर्टन, संस्कृति तथा नागरिक उड्डयन मन्त्रालयका सहसचिव डण्डुराज घिमिरे र काठमाडौँ महानगरपालिका कार्यकारी अधिकृत रुद्रसिंह तामाङले आ–आफ्नो क्षेत्रमा भएका पुनर्निर्माणका काम र आगामी योजनाबारे जानकारी गराउनुभएको प्राधिकरणद्वारा जारी विज्ञप्तिमा उल्लेख छ । रासस