दुई हजार तीन सयलाई खानेपानी वितरण
उदयपुर / २० मङ्सिर । उदयपुर जिल्लाको पूर्वी क्षेत्रको हँडिया गाविसमा झन्डै दुई हजार ३०० जनसङ्ख्याको लागि बृहत् खानेपानीको धारा वितरण गरिएको छ ।
रु तीन करोडको लागतमा निर्माण कार्य सुरु भएको उक्त खानेपानी योजनाको आइतबार नै उदयपुर क्षेत्र नम्बर ३ का सांसद तथा पूर्व सहरी विकासमन्त्री डा नारायण खड्काले औपचारिक रुपमा उक्त खानेपानी योजनाको उद्घाटन गर्नुभएको हो ।
सरकार र स्थानीय उपभोक्ताको समेत रु तीन करोडको आर्थिक लगानीमा उक्त खानेपानी योजना सञ्चालन भएको हँडिया खानेपानी योजना उपभोक्ता समितिका अध्यक्ष कुमार बस्नेतले बताउनुभएको छ ।
जमिनबाट बोरिङ प्रणालीको सहयोगले पानी निकालेर ट्याङ्कीमा जम्मा गरेर पानी वितरण कार्य सुरु भएको बताइएको छ ।
यसका लागि अहिले एउटा एक लाख लिटरको ट्याङ्की निर्माण भइसकेको र झन्डै ९० धाराबाट पानी वितरण भइरहेको अध्यक्ष बस्नेतले बताउनुभयो ।
अब बाँकी अर्को ट्याङ्की समेत निर्माण हुँदै गरेको र बाँकी ११० वटा धारा पनि निर्माण सम्पन्न हुन लागेको छ ।
यस क्षेत्रका वडा नम्बर ५, ६ र ७ तथा ९ का झन्डै दुई हजार ३०० जनताको लागि २०० धारा वितरण गर्न लागिएको उपभोक्ता समितिले बताएको छ ।
खानेपानी व्यवस्थापन पछि हँडियामा हिउँद तथा वर्षा जुनसुकै समयमा पनि पानीको समस्या नहुने उपभोक्ता समितिका अर्का सदस्य कृष्ण कार्कीले बताउनुभयो । रासस