नेउवामहासङ्घको हुलाक टिकट सार्वजनिक
काठमाडौँ, ४ पुस । सूचना तथा सञ्चारमन्त्री सुरेन्द्रकुमार कार्कीले नेपाल उद्योग वाणिज्य महासङ्घको प्रतीकचिह्नअङ्कित हुलाक टिकट आज सार्वजनिक गर्नुभएको छ ।
यहाँ आज महासङ्घको स्वर्ण महोत्सवका उपलक्ष्यमा हुलाक सेवा विभागद्वारा आयोजित कार्यक्रममा मन्त्री कार्कीले रु १० को उक्त टिकट सार्वजनिक गर्दै टिकट प्रकाशनको पहिलो टाँचासमेत लगाउनुभयो ।
सो अवसरमा उहाँले सरकार र निजी क्षेत्रले एकार्कालाई सहयोग गर्ने वातावरण बनाउनुपर्नेमा जोड दिनुभयो । उहाँले अहिलेको सङ्क्रमणकाललाई परिपक्क तरिकाले बढाउनुपर्नेमा जोड दिनुभयो । उहाँले व्यवस्थापनको अभावले देश गरिब भएको तर्फ पनि ध्यानाकर्षण गराउनुभयो ।
कार्यक्रममा सञ्चार मन्त्रालयका सचिव दिनेशकुमार थपलियाले सरकार निजी क्षेत्रसँग साझेदारी र सहकार्य गर्न तयार रहेको बताउनुभयो ।
विभागका महानिर्देशक सुरेश अधिकारीले महासङ्घले देशको आर्थिक क्षेत्रमा पु¥याएको योगदानको कदर गर्दै हुलाक टिकट प्रकाशन गरिएको बताउँदै मुलुकको आर्थिक विकासमा सहयोग पु¥याउने अन्य संस्थाको पनि हुलाक टिकट क्रमशः प्रकाशन गरिने जानकारी गराउनुभयो । सो टिकट सन् २०१७ मा बजारमा ल्याइने छ ।
कार्यक्रममा महासङ्घका अध्यक्ष पशुपति मुरारकाले हुलाक टिकट प्रकाशन गरेर सरकारले महासङ्घको एकचालिस वर्षको इतिहास र गरिमालाई बढाएको बताउनुभयो । महासङ्घका वरिष्ठ उपाध्यक्ष भवानी राणा, हुलाक टिकट सङकलन सङ्घका अध्यक्ष शङ्कर श्रेष्ठलगायतले सरकारले निजी क्षेत्रको टिकट प्रकाशन गरेर राम्रो काम गरेको बताउनुभयो ।
करिब २० लाख प्रति छापिएको टिकट ३५ मिलिमिटर×४५ मिलिमिटरको आकारको छ । विभिन्न पाँच रङमा रहेको उक्त टिकट इन्डोनेसियामा छापिएको हो । टिकटको डिजाइन पूर्णकला लिम्बूले गरेकी हुन् । रासस