भूकम्प प्रभावितले छिट्टै राहत पाउँछन् : ज्ञवाली; कास्कीमा १३ हजारभन्दा बढी भूकम्पप्रभावित परिवार
चितवन, ५ पुस । राष्ट्रिय पुनःनिर्माण प्राधिकरणका प्रमुख कार्यकारी अधिकृत सुशील ज्ञवालीले भूकम्पप्रभावित १७ जिल्लामा राहतका लागि छिट्टै काम अघि बढाइने बताउनुभएको छ ।
ती जिल्लामा सङ्कलन भएका प्रभावितको घरधुरी सर्वेक्षण गरी वास्तविक क्षतिको पहिचान गरी पुनःनिर्माणका लागि राहत प्रदान गरिने उहाँले बताउनुभयो ।
जिल्ला समन्वय समिति चितवनले आज यहाँ आयोजना गरेको कार्यक्रममा उहाँले वास्तविक क्षतिको पहिचान भएसँगै पुनः घर निर्माणका लागि किस्ता बन्दीमा रकम उपलब्ध गराउने बताउनुभयो ।
घरको डिपिसी गर्नुअघि रु ५० हजार, डिपिसीपछि रु एक लाख ५० हजार, छानो छाउनुअघि रु ७५ हजार र शौचालय निर्माणपछि मात्र २५ हजार रुपैयाँ बैंकमार्फत उपलब्ध गराइने उहाँले बताउनुभयो । अब निर्माण गरिने संरचना पूर्णरुपमा भूकम्पप्रतिरोधी हुनुपर्ने भन्दै उहाँले यसअघि भूकम्पले भत्काएर पुनः आफँै बनाएका घर भूकम्पप्रतिरोधी भएमा पनि राहत उपलब्ध गराइने ज्ञवालीले बताउनुभयो ।
उहाँले यी जिल्लामा हालसम्म जे जति ढिला भएपनि अब तीव्रगतिमा काम अघि बढ्ने बताउनुभयो । चितवन जिल्लाका स्थानीय विकास अधिकारी श्रवणकुमार पोख्रेलले जिल्लामा १८ हजार सातसय ५२ वटा निवेदन परेको बताउनुभयो । सुरुमा पूर्ण र आंशिक गरी १५ हजार सात सय ४९ घरधुरीले कार्ड लिएकामा पछि छुटेको सङ्ख्या थपिएको पनि उहाँले बताउनुभयो ।
सो अवसरमा सांसद रामकृष्ण घिमिरे, शेषनाथ अधिकारी, गीता वाग्ले, सन्तकुमार दराई लगायत दलका प्रमुख एवम् प्रतिनिधिले भूकम्पप्रभावितले राहत पाउन ढिलाइ भएको भन्दै अबको कामलाई तीव्रता दिन आग्रह गर्नुभएको थियो ।
कास्कीमा १३ हजारभन्दा बढी भूकम्पप्रभावित परिवार
जिल्ला लगत सङ्कलन व्यवस्थापन कार्यालय कास्कीले जिल्लामा भूकम्पका कारण प्रभावित १३ हजार एकसय पाँच घरपरिवारको लगत सङ्कलन गरी केन्द्रीय तथ्याङ्क विभागमा पठाएको छ ।
जिल्ला लगत सङ्कलन व्यवस्थापन कार्यक्रम संयोजक जग्गुलाल बस्यालका अनुसार सङ्कलित लगत केन्द्रीय तथ्याङ्क विभागबाट प्रमाणीकरण गरी भूकम्पपीडितको आधिकारिक सूची तयार गरिनेछ ।
राहत एवम् पुनःनिर्माण सहयोगका लागि सूचीका आधारमा यही पुस १३ गतेदेखि केन्द्रस्तरबाट खटिने तालिम प्राप्त इन्जिनियर र स्थानीय सामाजिक परिचालकको टोलीले स्थलगत अवलोकन गरी क्षतिका आधारमा बस्न हुनेदेखि पुनःनिर्माण गर्नुपर्नेसम्मका कुरा निक्र्यौल गर्नेछ ।
यसैबीच, भूकम्पपीडितको नामावली सङ्कलन, प्रमाणीकरण, अनुदान सम्झौता लगायतका विषयमा छलफल गर्न आज जिल्ला समन्वय समिति, कास्कीको बैठक बसेको थियो । बैठकमा राष्ट्रिय पुनःनिर्माण प्राधिकरणका सदस्य डा चन्द्रबहादुर श्रेष्ठ, सांसद शारदा पौडेल, प्रमुख जिल्ला अधिकारी हरिप्रसाद मैनाली, स्थानीय विकास अधिकारी बलराम ढकाल लगायतको उपस्थिति रहेको थियो ।
बैठकमा भूकम्पपीडितको लगत सङ्कलन लगायतका विषयमा जानकारी लिँदै प्राधिकरणका सदस्य डा श्रेष्ठले सङ्कलित लगत प्रमाणीकरण भइसकेपछिको पुनःनिर्माण कार्यविधिबारे जानकारी गराउनु भएको थियो ।
सांसद शारदा पौडेलले भूकम्पपीडित परिवारले यथाशक्य चाँडो पुनःनिर्माण लगायतमा सहयोग पाउने किसिमबाट कामलाई तीव्रता दिनुपर्ने धारणा राख्नुभयो । रासस