निर्वाचनका लागि भरपर्दो सुरक्षा व्यवस्था गरिएको छ – उपप्रधानमन्त्री निधि; गाउँ–नगरका समस्या समाधान गर्ने नेमकिपाको प्रतिबद्धता
काठमाडौँ, वैशाख ७ गते । उपप्रधानमन्त्री एवम् गृहमन्त्री विमलेन्द्र निधिले स्थानीय तहको निर्वाचनको सुरक्षा व्यवस्थालाई प्रभावकारी बनाउन सुरक्षा निकायलाई योजनाबद्ध रुपमा परिचालन गरिएको बताउनुभएको छ ।
व्यवस्थापिका–संसद्को आजको बैठकमा विशेष समय लिएर बोल्दै गृहमन्त्री निधिले २० वर्षपछि हुन लागेको निर्वाचनलाई शान्तिपूर्ण, भयरहित बनाउन केन्द्रीय, क्षेत्रीय तथा स्थानीय योजना बनाएर लागू गरिएको उल्लेख गर्नुभयो ।
जिल्ला तहमा प्रमुख जिल्ला अधिकारीको नेतृत्वमा सबै सुरक्षा निकाय संलग्न रहने गरी समन्वयात्मक सुरक्षा योजना लागू गरिएको, प्रष्टताका साथ योजना बनाइएको र शान्ति सुव्यवस्था कायम गरी निर्वाचनको वातावरण बनाइएको र राजनीतिक दलले निर्वाचनको प्रचारप्रसारसमेत सुरु गरिसकेको जानकारी उहाँले दिनुभयो ।
निर्वाचनलाई भयरहित बनाउन सरकारको तर्फबाट कुनै पनि कसर बाँकी नराखिएको र सरकार पूर्ण क्षमताका साथ आवश्यक वातावरण बनाउन लागिपरेको उहाँले स्पष्ट पार्नुभयो ।
निर्वाचनलाई स्वतन्त्र, निष्पक्ष र भयरहित बनाउन निर्वाचनपूर्व, निर्वाचन अवधि र निर्वाचनपछि पनि पूर्णरुपमा सुरक्षा प्रदान गर्ने योजना बनाइएको र लागू गरिएको उहाँको भनाइ थियो ।
सरकारले सामान्य, संवेदनशील र अतिसंवेदशील क्षेत्र पहिचान गरी निर्वाचनका लागि सुरक्षा निकायलाई परिचालन गरिएको जानकारी पनि उहाँले दिनुभयो ।
गृहमन्त्री निधिले सांसद सत्यनारायण मण्डलको घरमा भएको भनिएको आक्रमण र दुव्र्यवहारमा संलग्नमाथि कारबाहीको प्रक्रिया अगाडि बढाइएको सदनलाई जानकारी दिनुभयो । मुलुकका विभिन्न स्थानमा भएको आगलागी, चट्याङ, पहिरोमा परेर भौतिक तथा मानवीय क्षति भएकालाई सरकारले क्षतिपूर्ति प्रदान गरेको र केही स्थानमा बाँकी रहेको भए शीघ्र राहत प्रदान गरिने पनि उहाँले बताउनुभयो ।
गाउँ–नगरका समस्या समाधान गर्ने नेमकिपाको प्रतिबद्धता
नेपाल मजदुर किसान पार्टीले आफ्ना जनप्रतिनिधिमार्फत मजदुर, किसान, प्रगतिशील बुद्धिजीवी, पुँजीपति वर्गसमेतको सहयोग तथा समर्थनमा गाउँपालिका र नगरपालिकाका समस्या समाधान गर्ने प्रतिबद्धता व्यक्त गरेको छ । पार्टीले आज सार्वजनिक गरेको ‘स्थानीय तह निर्वाचन घोषणापत्र २०७४’ मा भूबनोटअनुसार घर बनाउन जनतालाई भार नपर्ने गरी स्थानीय तह र सरकारी निकायबाट माटो परीक्षणको व्यवस्था मिलाइने जनाएको छ ।
पार्टीले बौद्धिक क्षेत्रको सहयोगमा आवास, पर्यटन, औद्योगिक, कृषि, शैक्षिक, हरितल क्षेत्रलगायतका भूउपयोग सम्बन्धी नक्सा तयार गरी कार्यान्वनमा ल्याउने प्रतिबद्धता व्यक्त गरेको छ ।
पार्टीले गाउँपालिकामा जनताको नागरिक भावनाको विकास गरी गाउँपालिकाकालाई सफा र स्वच्छ बनाउने, पानीका स्रोत सफा राख्ने, बाढीपहिरो नियन्त्रणका लागि वृक्षारोपण गर्नेलगायतका विकास निर्माणका कार्यलाई जोड दिएको छ ।
त्यसैगरी नगरपालिकामा सडकको सरसफाइ, हरियाली, खानेपानी आपूर्ति, नमुना विद्यालय तथा कलेज स्थापना र कालोबजार, कृत्रिम अभाव गर्नेजस्ता कार्यलाई कानुनी दायरामा ल्याई उपभोक्ताको अधिकार स्थापित गर्ने सो पार्टीले घोषणापत्रमा उल्लेख छ ।
पार्टी अध्यक्ष नारायणमान बिजुक्छेले घोषणापत्र, वर्गआधार, पार्टीको सिद्धान्त मिल्ने पार्टीसँग सहकार्य गरेर आफ्नो पार्टी अगाडि बढ्ने स्पष्ट गर्नुभयो । उहाँले २८ जिल्लामा आफ्नो पार्टीले उम्मेदवारी दिने घोषणासमेत गर्नुभयो ।
मधेस केन्द्रित दललाई निर्वाचमा ल्याउने विषयमा पार्टी अध्यक्ष बिजुक्छेले निर्वाचनलाई सफल बनाउन चरणबद्ध निर्वाचन गर्न सकिने धारणा पनि व्यक्त गर्नुभयो । रासस