निजी आवास अनुदान रकम वितरण कार्य सुरु
खोटाङ, जेठ २० गते । खोटाङका भूकम्पपीडितलाई निजी आवास अनुदान रकम वितरण गर्न थालिएको छ ।
२०७२ साल वैशाख १२ गतेको विनाशकारी भूकम्पका कारण क्षतिग्रस्त निजी आवास तथा भवन पुनःनिर्माणका लागि शुक्रबारदेखि सालपा विकास बैंक र सेञ्चुरी कमर्सियल बैंकबाट अनुदान वितरण सुरु गरिएको हो ।
भूकम्पबाट क्षतिग्रस्त निजी आवास पुनःनिर्माणका लागि उनीहरुलाई पहिलो किस्ताबापत रु ५० हजारका दरले पहिलोपटक अनुदान बाँड्न थालिएको जिल्ला समन्वय समितिका कार्यक्रम अधिकृत रविकिरण आचार्यले बताउनुभयो ।
सालपा विकास बैंकको कार्यालयमा प्रमुख जिल्ला अधिकारी प्रल्हद पोखरेलले ऐसेलुखर्क गाउँपालिका– २ बाकाचोलका भूकम्पपीडित रिमानसिं तामाङलाई चेक हस्तान्तरण गरेर अनुदान रकम वितरणको सुरुवात गर्नुभयो ।
सालपा र सेञ्चुरी कमर्सियल बैंकबाट एक हजार ३५४ लाभग्राहीलाई आवास अनुदान रकम वितरण गरिने जनाएको छ । सालपा विकास बैंकबाट हलेसी तुवाचुङ नगरपालिका र ऐसेलुखर्क गाउँपालिकाका ५१८ लाभग्राहीलाई आवास अनुदान रकम वितरण हुने बताइएको छ ।
यस्तै, सेञ्चुरी कमर्सियल बैंकबाट केपीलासगढी र लामिडाँडा गाउँपालिकाका ८३६ लाभग्राहीलाई आवास अनुदान रकम वितरण गरिने कार्यक्रम अधिकृत आचार्यले बताउनुभयो ।
उहाँकाअनुसार बैंक अफ काठमाडौँबाट रुपाकोट मझुवागढी नगरपालिकाका लाभग्राहीलाई, राष्ट्रिय वाणिज्य बैंक दिक्तेलबाट साकेला गाउँपालिकाका लाभग्राहीलाई, ज्योति विकास बैंकबाट दिप्रुङ र बराहपोखरी गाउँपालिकाका लाभग्राहीलाई तथा खोटाङबजारस्थित राष्ट्रिय वाणिज्य बैंकको शाखा कार्यालयबाट खोटेहाङ र जन्तेढुङ्गा गाउँपालिकाका लाभग्राहीलाई आवास अनुदान रकम वितरण गर्ने व्यवस्था मिलाइएको छ । रासस