नयाँ जात भित्रिएपछि पुनः केराखेतीमा
बाग्लुङ, असार ४ गते । स्थानीय जातका केरामा फैलिएको रोग र कीराको प्रकोप नियन्त्रणमा नआउँदा केरा खेती नै छोड्न बाध्य बनेका यहाँका किसान नयाँ जात भेटेपछि पुनः व्यावसायिक खेतीतर्फ फर्किएका छन् । बाग्लुङको जैमिनी नगरपालिका क्षेत्रमा गरिँदै आएका स्थानीय जातका मुङ्ग्रे, ढुस्रे, फुस्रे, घिउकेरालगायतका जातमा रोग र कीराको प्रकोप नियन्त्रणमा नआएपछि केही वर्षदेखि किसानले केराखेती गर्न छोडेका थिए । स्थानीय किसान प्रेम चापागार्इंका अनुसार स्थानीय जातका केरा लगभग लोप नै हुने अवस्थामा पुगेका छन् ।
जैमिनीको मुख्य बजार कुश्मीसेरा र आसपासका क्षेत्रमा यातायातका साधन सहज रूपमा पुगेपछि केराले राम्रो बजार पाएको चापागार्इंले बताउनुभयो । रोगको प्रकोप र उत्पादन सोचेजस्तो नभएपछि विस्थापित बनेका किसान नयाँ जातको केरा भित्रिएपछि पुनः व्यावसायिक रूपमै लागेको चापागाईंको भनाइ छ । जैमिनी क्षेत्रका खेतीयोग्य जमिनमा पनि नयाँ जातको केराको व्यावसायिक खेती भइरहेको छ ।
प्राविधिकको सरसल्लाहअनुसार लामो समयसम्म टिक्ने, रोगले आक्रमण नगर्ने, खान मिठो हुने र बढी मूल्यमा बिक्री हुने जातका केराको खेती गर्न थालिएको स्थानीय किसानले बताएका छन् । अहिले नयाँ जातको केराबाट मनग्य आम्दानी गर्न सफल भएको किसान चापागार्इंले बताउनुभयो ।
जैमिनी नगरपालिका वडा नं. १ मा मात्र २० भन्दा बढी किसानले व्यावसायिक रूपमा केराखेती गर्दै आइरहेका छन् । नयाँ जातको खोजी गर्दै जाँदा चितवनमा राम्रो केरा भेटिएपछि त्यही केरालाई बाग्लुङमा ल्याएर खेती सुरु गरिएको चापागाईंले बताउनुभयो । उक्त केराको स्थानीय जैमनी नाम राखेका छन् । चितवनबाट ल्याउँदा केराको नाम भनेनन्, बाग्लुङमा ल्याएपछि राम्रो भएपछि जैमनी नाम राखेरै व्यावसायिक रूपमा खेती गरिरहेका छौँ, एक किसानले भन्नुभयो ।