उग्र बन्दै धनकुटाको आन्दोलन, निषेधाज्ञा जारी; डोटीमा प्रहरी र आन्दोलनकारीबीच झडप, ३ जना घाइते
काठमाडाैँ, ४ माघ | सरकारले बुधबार १ नम्बर प्रदेशको अस्थायी राजधानी विराटनगर तोकेपछि यतिखेर धनकुटामा चर्को नाराबाजीका साथै विरोध प्रदर्शन भएको छ ।
विराटनगरलाई राजधानी तोकेपछि बिहीबार विरोधमा उत्रिएका धनकुटाबासी र प्रहरीबीच धनकुटा ६ भीमनारायण चोकमा दोहोरो झडप समेत भएको छ । झडपका क्रममा प्रहरीको लाठीचार्जबाट ४ जना प्रदर्शनकारी घाइते भएका छन् । धनकुटाका नेपाली कांग्रेस पार्टी सचिव दिनेश राईको टाउकोमा गम्भीर चोट लागेको छ भने अन्य घाइते सामान्य उपचारपछि घर फर्किएका छन् । उनीहरुको जिल्ला अस्पताल धनकुटामा उपचार भएको हो ।
आन्दोलनकारीले बिहीबार बिहान १० बजे प्रशासन कार्यालयमा आगजनी गरेका थिए । जिल्ला प्रहरी कार्यालय, धनकुटाका अनुसार आगजनीबाट कार्यालयको दुई थान कम्प्यूटर, प्रिन्टर लगायतका सामग्री जलेर नष्ट भएको छ ।
प्रदर्शनकारीहरुले आक्रोशमा उत्रिएर क्षेत्रीय प्रशासन कार्यलय र शहरी विकाश तथा भवन निर्माण डिभिजन विभाग कार्यलयमा तोडफोड गरेका हुन् । उनीहरुले श्रमिक दलित हकहित मोरङद्वारा सञ्चालित को २ च ४३२ नम्बरको भोजपुर तर्फ बिरामी लिन जाँदै गरेको एम्बुलेन्स समेत तोडफोड गरेका छन् । त्यस्तै को १ ब १०६४ नम्बरको मोटरसाईकल समेत पूर्ण रुपमा तोडफोड गरेका छन् ।
प्रदर्शनकारी उग्र रुपमा आन्दोलनमा उत्रिएपछि निषेधाज्ञा जारी गरेको प्रमुख जिल्ला अधिकारी प्रेमप्रकाश उप्रेतीले जानकारी दिएका छन् । धनकुटाको जिरो पोइन्ट, सल्लेरी, क्षेत्रीय प्रशासन कार्यलय, बिहीबारे हट्या, सिरुवानी लगायतको क्षेत्रमा निषेधाज्ञा जारी गरेको उनले बताए ।धनकुटालाई अस्थायी राजधानी बनाउनुपर्ने माग राख्दै धनकुटाबासी केही दिनदेखि आन्दोलनरत थिए ।
डोटीमा प्रहरी र आन्दोलनकारीबीच झडप, ३ जना घाइते
डोटीमा प्रदेश राजधानी माग्दै सुरु भएको आन्दोलन उग्र बन्दै गएको छ । बिहीबार प्रहरी र आन्दोलनकारीबीच झडप हुँदा तीन जना घाइते भएका छन् ।
क्षेत्रिय प्रशासन कार्यालय डोटीमा आन्दोलनकारीले ढुङ्गामुडा गरेपछि प्रहरीले १० राउण्ड अश्रुग्यास प्रहार गरेको थियो । अश्रुग्यास प्रहारबाट दिसिनपा-४ का ४३ वर्षीय भरत बिक, दिसिनपा -१ का ४० वर्षीय नारायण खड्का र केआईसिं गाउँपालिकाका करी भण्डारी घाइते भएका छन् । विकलाई थप उपचारको लागि धनगढी रिफर गरिएको सुजङ अस्पतालले जनाएको छ । अन्य २ जना सुजङ अस्पताल राजपुरमा उपचारत छन् ।
प्रदेश ७ को अस्थायी राजधानी धनगढी तोकिएपछि आक्रोशित बनेका डोटीको दिपायलका स्थानीय आक्रोशित बनेका हुन् । उनीहरु दिपायललाई प्रदेश राजधानी बनाउनुपर्ने माग राख्दै आन्दोलनरत थिए ।
आन्दोलनकारीले आजै दिपायलको पिपल्ला बजारमा रहेको ट्राफिक प्रहरीको चेक पोष्टमा आगजनी समेत गरेका थिए । डोटीका बिभिन्न ठाउँमा सरकारले गरेको निर्णयका बिरुद्धमा प्रर्दशन भैरहेको छ ।
बन्दका कारण वीरगञ्जको जनजीवन प्रभावित
प्रदेश नं २ को प्रादेशिक राजधानी वीरगञ्ज हुनुपर्ने माग राख्दै बिहीबारदेखि वीरगञ्ज बन्दको आह्वान गरिएको छ । बन्दका कारण वीरगञ्जको जनजीवन प्रभावित भएको छ ।
सरकारले बुधबार अस्थायी राजधानी जनकपुरलाई तोकेको विरोधमा आज वीरगञ्ज बन्द गरिएको हो । जनकपुरलाई प्रदेशका अस्थायी राजधानी तोकेपछि वीरगञ्जमा असन्तुष्टी बढेको छ । वीरगञ्जलाई प्रादेशिक राजधानीको घोषणा गर्न दवाव दिनका लागि गठित संघर्ष समितिको आह्वानमा बन्द घोषणा गरिएको हो ।
एम्बुलेन्स, दमकल अत्यावश्यक सवारी साधन बाहेक सम्पूर्ण पसल बजार सबै ठप्प पारिएको संघर्ष समितिले जनाएको छ । बन्दका कारण बिहानै देखि सडक अवरुद्ध गरिएको छ, भने ठाउँ-ठाउँमा टायर बालेर प्रदर्शन गरिएको छ । मोटरसाईकल, ईरिक्सा भने निर्वाद रुपमा चलेका छन् ।
संघर्ष समितिका सह संयोजक राजकुमार गुप्ताको नेतृत्वमा वीरगञ्जको घण्टाघर, माईस्थान मुर्ली, लगायतका क्षेत्रमा टायर बालेर प्रदर्शन गर्नुको साथै सवारी साधन, बजार पसल, शैक्षिक संस्था, कलकारखना ठप्प पारिएको छ ।
प्रदर्शनकारीहरुले सरकार, फोरम नेता उपेन्द्र यादव, राजपाका नेता राजेन्द्र महतो लगायतको विरोधमा नाराबाजी समेत गरेका छन् । जनकपुरलाई नभई वीरगञ्जलाई प्रादेशिक राजधानी घोषणा गर्नुपर्ने माग राखेर संघर्ष समितिको आह्वानमा घण्टाघरमा रिले अनशन पनि चलिरहेको छ ।
रुपन्देहीलाई प्रदेश राजधानी बनाएपछि दाङ आन्दोलित
प्रदेश नम्बर ५ मा रुपन्देहीलाई अस्थायी मुकाम तोकिएपछि दाङमा आन्दोलन चर्किएको छ। दाङका सबैजसो दल आन्दोलनमा छन्। एमाले जिल्ला अध्यक्ष टिकाराम खड्काको संयोजकत्वमा संघर्ष समिति गठन भएको छ। खड्कासहित माओवादी केन्द्रका सहइन्चार्ज निर्मल आचार्य र कांग्रेस सचिव शंकर डाँगीले जिल्लाका विभिन्न ठाउँमा भएका प्रदर्शनको नेतृत्व गरिरहेका छन्।
बिहीबार प्रतिनिधिसभा निर्वाचनमा क्षेत्र नम्बर १ मा एमालेका तर्फबाट विजयी मेखमणि चौधरीको उपस्थितिमा संघर्ष समितिको बैठक बसी खड्काको नेतृत्वमा संघर्ष समिति गठन भएको हो। प्रदेशसभा निर्वाचनमा कांग्रेसबाट ३ (क) मा विजयी डिल्ली चौधरी र एमालेबाट २ (ख) मा विजयी अमर डाँगी पनि प्रदर्शनमा देखिएका छन्।
दाङबाट प्रतिनिधिसभामा निर्वाचित माओवादी केन्द्रका नेता कृष्णबहादुर महराले बुधबार नै विज्ञप्ति निकालेर दाङ प्रदेश ५ को राजधानी हुनुपर्ने बताएका छन्। प्रदेश नम्बर ५ को मुख्यमन्त्रीका दाबेदार एमाले नेता शंकर पोखरेलले जनमत गुमाएको सरकारले विवेक गुमाएको टिप्पणी गर्दै प्रदेशसभाले विवेकसम्मत निर्णय गर्ने बताएका छन्।