युवा गाईपालनतर्फ आकर्षित

इनरुवा, चैत २१ गते । सुनसरीको बराहक्षेत्र नगरपालिकाका युवा गाईपालनतर्फ आकर्षित भएका छन् । वैदैशिक रोजगारमा जानुभन्दा स्वदेशमै गर्ने सोचका साथ युवाले गाईपालन गर्न थालेका छन् । बराहक्षेत्र नगरपालिका ६ का २८ वर्षीय राजकुमार यादव र २७ वर्षीया गङ्गाई मेहता महेन्द्र बहुमुखी क्याम्पसमा स्नातक तहमा कानुन विषय अध्ययनरत विद्यार्थी हुनुहुन्छ । उहाँ दुवै जना पढाइलाई समेत निरन्तरता दिने गरी गाईपालनमा व्यस्त हुनुहुन्छ । उहाँहरूको गाईगोठमा २८ वटा गाई र बाछी छन् ।

प्रवेशिका परीक्षापछि गाउँघरका युवा विदेश जाने र केहीले राम्रो कमाइ गर्ने अनि केही ठगीमा परेर सर्किने र केही ज्यानै समेत गुमाएको हेरेर विदेशभन्दा आफ्नै गाउँमा श्रम गर्ने सोंचले उहाँहरुले गाईपालन सुरु गुर्नभएको हो । सुरुमा दुई÷चारवटा गाई पालेर सुरु गरेको गाईपालन अहिले २८ वटा पुगेको छ ।

शिवगङ्गा कृषि विकास फर्म दर्ता गरी २०७२ सालदेखि २८ वटामा गाई राखेर व्यावसायिक रूपमा गाईपालन थालेको उहाँहरूको भनाइ छ । फर्ममा डीसीआईपी नेपाल र होलिस्टेन जातका उन्नत बाछीबाट गाई बनाएको सञ्चालक राजकुमार यादवले जानकारी दिनुभयो । व्यवस्थापन सङ्कायमा कक्षा १२ पास गरी बीएल अध्ययनरत यादवको परिचय एउटा विद्यार्थी मात्रै नभई उहाँ गाउँको सबल किसानको रूपमा समेत परिचित हुनुहुन्छ । अध्ययनसँगै साँझ÷बिहानको समयमा आफूले परिवारको र साथीको ५० लाखको गोठ र जग्गा तथा ३० लाख रुपियाँ राष्ट्रिय वाणिज्य बैङ्कको ऋण लगानीमा गाईपालन थालेको यादवले बताउनुभयो । उहाँहरूको गोठमा २० वटा डीसीआईपी नेपाल र चारवटा होलिस्टेन जातका उन्नत बाछीबाट गाई बनाएको तथा तीनवटा जर्सी गाई र एक थान स्थानीय गरी २८ वटा गाई छ । यादवले दुई भाइ विदेशको मोह त्यागेर स्वदेशमै व्यवसाय गर्ने सोच बनाएर फर्केका र आफू विदेश नजाने सोचका भएकाले फर्म स्थापना गरेर व्यवसायमा लागेको बताउनुभयो ।

अर्का सञ्चालक मेहताले गाईपालन गर्दा यहाँका आठ जना युवाले मासिक १० देखि १२ हजार रुपियाँ तलब पाउने र खाने गरी रोजगार पाएको बताउनुभयो । डीसीआईपी नेपाल र होलिस्टेन जातका उन्नत गाईपालन राम्रो भए पनि केही समस्या उहाँले बताउनुभयो । दुध बेचेर मासिक दुई लाख २५ हजार रुपियाँ आम्दानी हुने र सबै खर्च कटाएर ३५ हजार रुपियाँ आफ्नो बचत हुने गरेको उहाँले जानकारी दिनुभयो ।