कोरोना महामारी रोकथाम, नियन्त्रणलाई थप प्रभावकारी र परिस्थितिलाई सहज तथा सन्तुलित बनाउन निर्देशन
काठमाडौं, चैत २१ गते । उपप्रधान तथा रक्षामन्त्री ईश्वर पोखरेलले कोरोना भाईरस कोरोना–१९ महामारी रोकथाम, नियन्त्रण र प्रतिकार्यको लागि स्थापना गरिएको छाउनीस्थित ‘कोभिड–१९ क्राइसिस म्यानेजम्याण्ट सेण्टर (सिसिएमसी)’ कार्यालयको शुक्रवार निरीक्षण गर्नु भएको छ ।
सिसिएसीका संयोजक समेत रहनु भएका पोखरेलले कोभिड–१९ क्राइसिस म्यानेजम्याण्ट सेण्टर (सिसिएमसी) को कार्यालय स्थापनासँगै हालसम्म भए गरेका काम कारवाहीको वारेमा जानकारी लिनु भएको सेनाले जनाएको छ ।
उक्त भ्रमणको क्रममा रक्षामन्त्री पोखरेलले कोरोना रोकथाम, नियन्त्रण र उपचार, संक्रमितलाई सुरक्षित ढंगले अस्पतालसम्म पु¥याई उचित उपचार ब्यवस्था, अत्यावश्यक औंषधी, उपकरण तथा स्वास्थ्य सामाग्रीका वारेमा जानकारी लिनु भएको छ ।
त्यस अवसरमा विज्ञ चिकित्सक, स्वास्थ्य सेवा विभाग र सैनिक चिकित्सकहरूले कोरोना नियन्त्रण गर्न आवश्यकताको पहिचान र खरिद प्रक्रियाको सम्बन्धमा प्रस्तुतिकरण गरी मन्त्रीलाई जानकारी गराईएको सैनिक प्रवक्ता विज्ञानदेव पाण्डेले बताउनुभयो ।
उक्त प्रस्तुतिकरणका क्रममा ‘लकडाउन’ को समयमा सुरक्षा व्यवस्थालाई थप प्रभावकारी बनाउने, अत्यावश्यक उपभोग्य समानहरूको आपूर्ति र राहत बितरणलाई प्रभावकारी बनाउने विषयमा समेत जानकारी गराईएको थियो ।
उपप्रधानमन्त्री एवं रक्षामन्त्री पोखरेलले पनि कोरोना महामारी रोकथाम, नियन्त्रण र प्रतिकार्यलाई थप प्रभावकारी बनाउन र वर्तमान परिस्थितिलाई सहज तथा सन्तुलित बनाउन सम्बद्ध सरोकारवाला निकाय सबैकोे साझा प्रतिवद्धता, मिहिनेत र ईमान्दारितामा जोड दिनुभयो । रासस