थप एक हजार ३५९ जना सङ्क्रमितसहित ४४ हजार २३६ पुग्याे; काठमाडौँ उपत्यकाका ४५४ मा सङ्क्रमण पुष्टि
काठमाडौँ, भदौ १९ गते । नेपालमा एक हजार ३५९ जना कोरोना सङ्क्रमित थपिएका छन् । थप ४६४ महिलासहित एक हजार ३५९ जना कोरोना भाइरस पुष्टि भएको छ ।
स्वास्थ्य तथा जनसङ्ख्या मन्त्रालयले दैनिक प्रेस ब्रिफिङमा पछिल्लो २४ घण्टामा थपिएकासँगै सङ्क्रमित हुने कुल ४४ हजार २३६ पुगेको जनाइएको छ ।
सक्रिय सङ्क्रमितहरू १८ हजार ४०४ रहेका छन् । संस्थागत आइसाेलेसनमा दश हजार ९४२ रहेका छन् । हाेम आइसाेलेसनमा सात हजार ४६२ रहेका छन् ।
पछिल्लो २४ घण्टामा एकहजार ३५४ जना कोरोना सङ्क्रमित निको भएर घर फर्केका छन् । योसँगै कुल निको हुने दर ५८ प्रतिशत छ । कुल डिस्चार्ज भएकाहरू २५ हजार ५६१ पुगेको छ ।
विदेशबाट फर्केका अधिकांश क्वारेन्टिनमा बसेका छन् । यसरी बस्नेहरू छ हजार ५६१ रहेका छन् ।
काठमाडौँ उपत्यकाका ४५४ मा सङ्क्रमण पुष्टि
काठमाडाैँ उपत्यकामा कोभिड–१९ का ४५४ जना सङ्क्रमितको पुष्टि भएको छ । उपत्यकाका तीन जिल्लामा कोरोनाका ४५४ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।
मन्त्रालयका प्रवक्ता डा. जागेश्वर गौतमले दैनिक प्रेस ब्रिफिङको क्रममा काठमाडाैँमा सबैभन्दा बढी ३८६, ललितपुरमा ३२ र भक्तपुरमा ३६ जना सङ्क्रमितको पुष्टि भएको जानकारी दिनुभयो । यसअघि बिहीबार काठमाडाैँ उपत्यकामा अहिलेसम्मकै सबैभन्दा बढी ४४५ जना सङ्क्रमितको पुष्टि भएको थियो । नेपालमा हाल १८ हजार ४०४ जनामा कोभिड–१९ सङ्क्रमण सक्रिय रहेको मन्त्रालयले जनाएको छ । पछिल्लो चौबीस घण्टामा अहिलेसम्मकै सबैभन्दा बढी एक हजार ३५४ जना सङ्क्रमित निको भई घर फर्केका छन् ।