एक हजार ९४५ थपिए, पाँच हजार ३६४ सङ्क्रमणमुक्त
काठमाडौं, मङ्सिर ५ गते । नेपालमा कोरोनाभाइरसका एक हजार ९४५ जना सङ्क्रमित थपिएका छन् । थपिएका सङ्क्रमितसँगै नेपालमा कुल सङ्क्रमितको संख्या दुई लाख १६ हजार ९६५ पुगेको छ ।
स्वास्थ्य तथा जनसंख्या मन्त्रालयले कोभिड–१९ सम्बन्धी विवरण अद्यावधिक गर्दै पछिल्लो चौबीस घण्टामा दश हजार ४४० जनाको आरटीपीसीआर परीक्षण गरिएकोमा एक हजार ९४५ जनामा सङ्क्रमणको पुष्टि भएको उल्लेख गरेको छ । हाल २४ हजार ६६५ जनामा भाइरसको सङ्क्रमण सक्रिय छ । हालसम्म १६ लाख ४३ हजार ८९९ जनाको परीक्षण गरिएको छ ।
मन्त्रालयका अनुसार पछिल्लो चौबीस घण्टामा पाँच हजार ३६४ जना सङ्क्रमित निको भएका छन् । हालसम्म एक लाख ९१ ह्जार दुई जना सङ्क्रमित निको भइसकेका छन् । मन्त्रालयले पछिल्लो चौबीस घण्टामा २२ जना सङ्क्रमितको मृत्यु भएको दर्ता गरेको छ । हालसम्म नेपालमा कोरोना सङ्क्रमणबाट एक हजार २९८ जनाको मृत्यु भएको मन्त्रालयले जनाएको छ । मन्त्रालयले हाल ७५३ जना क्वारेन्टिनमा रहेको जनाएको छ ।
उपत्यकामा एक हजार १०७ मा सङ्क्रमणको पुष्टि
काठमाडौं उपत्यकामा कोरोनाभाइरसका एक हजार १०७ जना सङ्क्रमित थपिएका छन् । स्वास्थ्य तथा जनसंख्या मन्त्रलायले कोभिड–१९ सम्बन्धी विवरण अद्यावधिक गर्दै पछिल्लो चौबीस घण्टामा उपत्यकाका तीन जिल्लामा एक हजार १०७ जना सङ्क्रमित पुष्टि भएको जनाएको छ ।
मन्त्रालयका अनुसार काठमाडौं उपत्यकाका तीन जिल्लामा ४८४ महिला र ६२३ पुरुषमा सङ्क्रमणको पुष्टि भएको छ । काठमाडौं जिल्लामा हाल नौ हजार ६८१ जनामा भाइरसको सङ्क्रमण सक्रिय छ । हालसम्म काठमाडौंमा ७१ ह्जार ५९१ जना निको भएका छन् । ३१६ जना सङ्क्रमितको मृत्यु भएको छ ।
त्यसैगरी, ललितपुरमा हाल दुई हजार २२८ जनामा सङ्क्रमण सक्रिय रहेको छ । नौ हजार ६३१ जना निको भएका छन् । ललितपुरमा ८९ जना सङ्क्रमितको मृत्यु भएको छ । भक्तपुरमा भने ७८३ जनामा भाइरसको सङ्क्रमण सक्रिय छ । छ हजार ४७० जना निको हुँदा ८३ जना सङ्क्रमितको मृत्यु भएको छ ।