कोरोना भाइरसका नौ हजार ३१७ सङ्क्रमित थपिए, २२५ जनाको मृत्यु; उपत्यकामा निषेधाज्ञा जेठ १३ गतेसम्म
काठमाडौं, बैशाख २८ गते । पछिल्लो चौबीस घण्टामा कोरोनाका ९हजार ३१७ नयाँ सङ्क्रमित थपिएका छन् भने २२५ जनाको कोरोनाका कारण मृत्यु भएको छ । साथै सो अवधिमा पाँच हजार २२५ जना निको हुनुभएको स्वास्थ्य मन्त्रालयले जनाएको छ । सो अवधिमा परीक्षण २१ हजार ३१६ जनाको परीक्षण गरिएको थियो ।
स्वास्थ्य तथा जनसङ्ख्या मन्त्रालयले कोभिड १९ सम्बन्धी दैनिक विवरण अद्यावधिक गर्दै थपिएका सङ्क्रमितसँगै नेपालमा कोरोनाका कुल सङ्क्रमितको सङ्ख्या चार लाख १३ हजार १११ पुगेको जनाएको छ ।
मन्त्रालयका अनुसार पछिल्लो चौबीस घण्टामा २२५ जनाले कोरोनाका कारण ज्यान गुमाएका छन् । हाल ९७ हजार ८ जनामा भाइरसको सङ्क्रमण सक्रिय छ । मन्त्रालयका अनुसार हाल ४४८ जना क्वारेन्टिनमा छन् । हालसम्म तीन लाख १२ हजार १९ जना निको भएकोमा आजसम्म चार हजार ४८ जनाको कोरोनाको कारण मृत्यु भएको छ ।
उपत्यकामा निषेधाज्ञा जेठ १३ गतेसम्म लम्ब्याउने निर्णय, थप कडाइ गरिने
काठमाडौं उपत्यकाको जारी निषेधाज्ञा थप १५ दिन थपिएको छ । आज काठमाडौं उपत्यकाका तीनवटै जिल्लाका प्रमुख जिल्ला अधिकारीको बैठकले निषेधाज्ञा थप गर्ने निर्णय गरेका हुन् । जारी निषेधाज्ञा जेठ १३ गते राती १२ बजेसम्म थप भएको छ ।
त्यस्तै बैठकले निर्माण सामग्री दिउसोमा ल्याउन नपाइने निर्णय गरेको छ । बैठकले विवाह, ब्रतबन्ध र भोजजस्ता कार्यक्रम पार्टी प्यालेसमा गर्न रोक लगाएको छ । विवाह, ब्रतबन्ध र भोजजस्ता कार्यक्रम घरमा गर्दा पनि १० जनाभन्दा बढी सहभागी हुन नपाइने निर्णय गरेको भक्तपुर जिल्ला प्रशासन कार्यालयका प्रमुख जिल्ला अधिकारी प्रेमप्रसाद भटटराईले गोरखापत्र अनलाइनलाई जानकारी दिनुभयो ।