असोज १ गतेबाट चाडपर्व लक्षित विशेष सुरक्षा योजना लागू
देवबहादुर कुँवर / काठमाडौँ, असोज १ गते । काठमाडौँ उपत्यकाको तीन जिल्लाहरुमा असोज १ गते शुक्रबारबाट चाडपर्व लक्षित विशेष सुरक्षा योजना लागू भएको छ । आसन्न दशैँ, तिहार, छठ र ईद पर्वलाई लक्षित गरी उक्त सुरक्षा योजना लागू गरिएको हो ।
चाडपर्वमा हुने सक्ने सम्भावित अपराध रोकथाम तथा नियन्त्रण, शान्तिसुरक्षा व्यवस्थापन र प्रभावकारी प्रहरी परिचालनका लागि काठमाडौँ, ललितपुर र भक्तपुरमा एकैसाथ लागू गरिएको महानगरीय प्रहरी कार्यालय, रानीपोखरीले जनाएको छ ।
महानगरीय प्रहरी प्रमुख एवं प्रहरी अतिरिक्त महानिरीक्षक (एआइजी) हरिबहादुर पालले चाडपर्वको समयमा हुनसक्ने चोरी, डकैति, पकेटमारी, लुटपाट, धम्की, चन्दा अशुली, अपहरण र फिरौतिलगायत कालोबजारी र सवारी दुर्घटना नियन्त्रण गर्न सुरक्षा योजना प्रभावकारी हुने बताउनुभयो ।
यसका लागि महानगरीय प्रहरी परिसर काठमाडौँले तीनहजार दुई ७१ जना सुरक्षाकर्मी परिचालन गरेको छ । त्यस्तैं, भक्तपुर र ललितपुरले पनि सोही संख्यामा सुरक्षाकर्मी खटाएको छ । तीन जिल्लामा करिव पाँचहजार पाँचसय प्रहरी खटिएका छन् ।
बैंक तथा वित्तीय संस्था, ब्यापारी केन्द्र, वजार, बसपार्क र सवारी साधन ‘स्टयाण्ड’ क्षेत्रमा सादा पोशाकका सुरक्षाकर्मी २४ घण्टा खटाइनुका साथै काठमाडौँ जिल्लाको ६१ स्थानमा नियमित सुरक्षा गस्ती बढाइएको छ ।
त्यस्तै, नियमित सुरक्षा गस्तीका लागि ४८ वटा चार पाङ्गे्र, ३५ वटा मोटरसाइकल र ८३ वटा क्यूआरटी (क्वीक रेस्पन्स टोली ) परिचालन गरिएको छ । काठमाडौँ प्रहरी प्रमुख वरिष्ठ प्रहरी उपरीक्षक अशोक सिंहले ४६ भन्दा बढी स्थानमा क्रस–चेकिङको व्यवस्था गरिएको बताउनुभयो ।
प्रत्येक दिन ३६ स्थानमा विहान ८ देखि १२ बजेसम्म र साँझ ३ बजेदेखि ६ बजेसम्म आकस्मिक चेकिङको व्यवस्था गरिएको छ । महिला हिंसा, यौनजन्य दुब्र्यवहार, सार्वजनिक यातायातका साधनमा हुने पकेटमारीका लागि हतियारसहितको विशेष टोली खटेको छ ।
दशँै तिहार मनाउन गृह जिल्ला फर्किनेहरुको सुविधाका लागि गोंगबु नयाँ बसपार्क, माछापोखरी, कलंकी, बल्खु, चाबहिल, गौशाला, कोटेश्वर, सुन्धारा र न्यूरोडलगायतका स्थानमा नागरिक सहायता कक्ष स्थापना गरी टिकटमा हुने कालोबजारी नियन्त्रण अभियान थालिएको छ ।
खाद्य तथा दैनिक उपभोग्य वस्तुमा हुने कालोबजारी र मिसावट रोक्न जिल्ला प्रशासन कार्यालय, वाणिज्य विभाग, नापतौल तथा गुणस्तर विभाग, उपभोक्ता अधिकार मञ्च र नागरिकको सहयोगमा नियमित बजार अनुगमनको व्यवस्था गरिएको छ ।
चाडपर्वमा हुने सवारी दुर्घटना रोक्न ट्राफिक नियम पालनामा कडाई गर्नुका साथै सिट क्षमता भन्दा बढी यात्रु राख्न नपाउने, मदिरा सेवन गरी सवारी चलाउने विरुद्ध कानुनी कारवाही गर्ने प्रहरीले जनाइएको छ ।
घर कोठा छोड्नु अघि झ्याल ढोका दुरुस्त ढंगले लगाउनुका साथै नगद, गहना र अन्य मूल्यवान सामाग्री सुरक्षित ढंगले राख्न प्रहरीले महानगरवासीमा अनुरोध गरेको छ । बसमा यात्रा गर्दा होस् वा सामान खरिद गर्दा चनाखो बन्न सुझाव दिँदै शंका लागेको व्यक्तिका सम्बन्धमा प्रहरीलाई सूचना दिन अपिल गरेको छ ।