२४ घण्टामा थप ५७ जनामा सङ्क्रमण, मृत्यु शून्य
काठमाडौं, चैत १ गते । पछिल्लो २४ घण्टामा ५७ जनामा कोरोना सङ्क्रमण पुष्टि भएको छ । चार हजार ७३४ जनाको पीसीआर परीक्षण गर्दा ५७ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।
सोही अवधिमा तीन हजार १५० जनाको एन्टिजेन परीक्षण गर्दा २६ जनामा सङ्क्रमण पुष्टि भएको छ ।
मन्त्रालयका अनुसार सात हजार ८८४ जनामा परीक्षण गर्दा पीसीआर र एन्टिजेन गरेर ८३ जनामा सङ्क्रमण पुष्टि भएको छ । सोही अवधिमा १३० जना सङ्क्रमणमुक्त भएका छन् । सङ्क्रमणमुक्त हुने दर ९८.३ प्रतिशत रहेको मन्त्रालयले जनाएको छ ।
त्यस्तै, मन्त्रालयले पछिल्लो २४ घण्टामा कुनै पनि सङ्क्रमितको मृत्यु नभएको जनाएको छ । हालसम्म मुलुकमा कोरोनाबाट मृत्यु हुनेको सङ्ख्या ११ हजार ९५० पुगेको छ ।
पछिल्लो २४ घण्टामा मुलुकमा एक लाख तीन हजार ५३८ जनाले कोरोनाविरुद्धको खोप लगाएका छन् । त्यस्तै, नेपालमा हाल चार हजार ७४६ जना सक्रिय सङ्क्रमित छन् ।