चैत २५ गतेदेखि चिनियाँ खोप लगाइने
काठमाडौँ, चैत २२ गते । चीनबाट ल्याइएको कोरोना भाइरस (कोभिड–१९) विरुद्धको खोप ‘भेरोसेल’ यही चैत २५ गते लगाउने तयारी सरकारले गरेको छ ।
आइतबार स्वास्थ्य तथा जनसंख्या मन्त्रालयमा चीनबाट ल्याइएको खोप लगाउने विषयमा छलफल भएको मन्त्रालयका प्रवक्ता डा. समीरकुमार अधिकारीले जानकारी दिए । ‘चीनबाट ल्याइएको खोप चैत २५ गतेपछि लगाउने विषयमा मन्त्रालयमा छलफल भएको छ’, प्रवक्ता अधिकारीले भने ।
चैत २५ गतेदेखि खोप लगाउने विषयमा छलफल भए पनि निर्णय भइनसकेको उनको भनाइ छ । प्रवक्ता अधिकारीले यो विषयमा सोमबारसम्म निर्णय हुने बताए ।
चीन सरकारले ८ लाख डोज कोरोना खोप ‘भेरोसेल’ नेपाललाई अनुदानमा उपलब्ध गराएको हो ।
सरकारले चीनबाट ल्याइएको खोप स्वास्थ्य सेवामा संलग्न व्यक्ति, चीन सरकारको छात्रवृत्तिमा चीनमा अध्ययन गर्न जाने विद्यार्थीलाई लगाइने छ ।
चिनियाँ खोप लगाउन औषधि व्यवस्था विभागले फागुन ४ गते अनुमति दिएको हो ।